طوابير طوابير

في باب شغل دماغك في الدستور كانوا عايزين الناس تكتب اخر مرة وقفوا في طابور وليه ومعنى الطوابير بالنسبة للمصريين.

طبعا كعادتى كتبت وبعت ولم تنشر بس المرة دى اختلفت معايا قولت لنفسي هم منشروهاش انا بقي هنشرها بس مش علي حبل الغسيل في المدونة..

واليكم الطابور:

الحمد لله ان مبقفش في طوابير العيش مش علشان انا مش عايزة لا لان العيش عندنا ملهوش طابور تاخذ شنطة العيش فيها اربعة ارغفة ب لحلوح اه والله والواحد ايه حجمه احد التعريفة لو توعوا عليها.

المهم اخر طابور اتحفر في دماغي كان

الاول :لما فكرت وتجرأت وقولت انقل ابنتى من التعليم الخاص الي التجريبي وطبعا ده مش علشان الخاص وحش لا سمح الله المهم كانت الطامة الكبري يعنى ازاى انقل روحت وقفت في طابورررررررررطويل عريض عند المنطقة التعليمية اللي انا تبعها وطبعاً مقولكش بقي علي الخناقات اللي كانت شغالة بين الموظفين في المنطقة وبين اولياء الامور محدش عاجبه حاجة وهنا وقفت الموظفة المسئولة وسابت المكتب وقالت مش هشتغل علشان طبعا اولياء الامور يبطلوا اعتراض وتزمر وبعد ما كنا زعلانين من الوقفة وطول الانتظار ومفيش حد بيمشي من الطابور اخذنا في المحايلة عليها علشان ترحمنا وترجع تشتغل تاني- شوفتوا بقي ايه الحلاوة دى.كل ده ولا كأن في مدير للمنطقة بالمكان قافل علي نفسه المكتب ولو شاطر وامك مجبتش غيرك تحاول تقابله.
الثاني: لما كنت عايزة اغير رخصة العربية وقفت في طابورررررررررطويل عريض برده بس المرة دى الفرق انه كان في عز الشمس والعرق بقي ايه يخليك تفكر في عرق يوم القيامة وتفضل طول ما انت واقف تتعوذ منه ودى بردة نعمة الحمد لله.
الطوابير دى بقي مش معناه ان ده نظام خالص ده امر واقع علشان مفيش مكان تقف او نتتظر فيه ولان اللي بيجي وعنده واسطة بيدخل ويخلص ولما يخرج تحس انه بيطلع لك لسانه او ضربك علي قفاك لان انت واقف ومستحمل تناكة الموظف عليك وغلاسته وحاسس ان ممكن اى كلمة تخرج منك سواء حلوة او وحشة ممكن توقف الشغلانة اللي انت عايز تخلصها وواخد اجازة او اذن من عملك ومستحمل كل ده وفي الاخر شكراً متعملش حاجة.
المصريين يحسوا امتى انها نظام لما كل واحد ياخد حقه وحقه بس في نفس الوقت مع الاخريين مش ده يدخل من خلف المكتب او يدس له لحلوحيين (جنيهين) في ايد الموظف وخلصت الشغلانة وابقي قابلنى لو حد نطق لانه لو نطق مش هيعمله حاجة والدنيا هتقف.
اما عن معنى الطوابير بالنسبة للمصريين فهى تهذيب وإصلاح)
ودمتم بخير يا سيادة الكوماندة المهم