جدول الدوري

علي سلامة كتب القصيدة دى وسمهاها جدول الدوري في باب اسمه كله من ده عجبتنى وقولت نتشارك الاستمتاع بها

جـــــدول الـــدوري

فيه يوم كده

بيبان من أوله

لاتقدر تبتديه

ولا تعرف تكمله

المهم

رميت دماغي علي المخدة

ورغم التعب معرفتش أنام

فتحت الجرنال إتخبط

ف جدول الدور العام

لقيته شبهنا

وبنفس الترتيب

معرفش من كام سنة

فريق ع القمة متربع

وبيبرطع لوحده قدام

وهتيفة وإعلام

يشترى ويبيع

لا حد يسأله منين

ولا أزاى ولا بكام

وف إيده كل مفاتيح

السعادة والآحلام

والقضايا والمحاكم

ودفاتر الشهر العقاري

والمواليد والوفيات

وجدول الانتخابات

وارقام جلوس التلامذة

وبيكسر المرفوع

ويشيل الهمزة

وهو البطل الوحيد

في جميع الافلام

وفريق في المنطقة الدافية

كل كام سنة

يكسب مرة

بالعفية

ولو نجح في الفزيا

يسقط تاريخ وجغرافيا

عنده شقة تمليك

في مدينة نصر

كرانيش في السقف

وأرضيات رخام

مسموح له في الخميس

الاول

من كل شهر

يمارس الحب والغرام

ويصحى يصليه الجمعة

ويتغدا ملوخية

ويغنى في الحمام

وباقي الفرق

تقريبا بتلعب حافية

لا حارس مرمي

ولا دفاع ولا هجوم

وتنام وتقوم خايفة

ساكنة ف حتة

في مدينة السلام

ومفيش طبعا في السقف كرانيش

ده يا دوب نص جير

ونص كسر قيشاني

من سوق الامام

وساعات تعيش..

في خيمة إيواء

وتعمل م النكتة لقمة..

وغطاء وفرشة

وعندها بنت دبلوم تجارة

وعيل صغير

صبي ميكانيكي ف ورشة

وبتكافح من اجل البقاء

تسمع اغاني من بعيد

وتتفرج ع الدنيا

في مراية الحلاق

ومطلوب منها

في نهاية ككل موسم

تشكر الأمن

وتهتف للبطل

وتشكر الحكام