جراكن جراكن

بصراحة خلاص انا هتجنن كل يوم البواب يرن الانتركم ويقول لي يا مدام املي ميه الميه جاطعة(دى لغته يقصد المية مقطوعة) مفيش ميه املي مية اد كده اه ويأما استعملها او ان الميه تيجى قبل ما استعملها اصل عندنا في العمارة 8 خزانات للمياه ثروة يعنى بس طبيعة لما المية بتقطع لفترة طويلة تتبدد الثروة دى الموضوع ده بقاله فترة طويلة وبعد تفكير افتكرت انى قرأت في الجرائد منذ فترة طويلة ان منسوب مياه النيل ارتفع طب اما هو كده امال المية بتقطع ليه بيتكلم بالصدفة عن موضوع المية المقطوعة قالولي احمدى ربنا قولت والله حمداه بس ليه -علي فكرة كان بقالي كتير منقطعة عن وسائل الاعلام- قالولي يعنى مسمعتيش عن البلد اللي المية اتقطعت فيها والناس كانت هتتجنن دى العاشرة مساء جابتهم وكمان 90 دقيقة رديت معقولة لا مسمعتش طب ايه المشكلة بالضبط محدش عارف روحت ابحث عن الموضوع ولقيت بهية كاتبة عليه في المدونة بتاعتها والصور تقطع القلب

يعنى انا زعلانة علشان الجركن اللي بملاه طب والناس دى تعمل ايه(اللي في الصورة اعلاه)

من فترة المية اتقطعت وكنت في الشغل معملتش حسابي في ملء الجركن اليتيم اللي عندى اللي جبته من السعودية فيه مية زمزم من الاخر جركن بركة بيكفينى طب اعمل ايه في الحوسة دى طبعا مقولكش الراجل اخذ الجركن اياه ونزل يلف علي الجوامع مش علشان يصلي علشان الجامع اللي فيه ميه يملء الجركن منه وكنت متضايقة علشانه ولما شوفت ده قولت لحال نفسي كلنا هذا الرجل

وبعدين جماعة اصحابي قالولي قدامك حل من اثنين مالهمش ثالث ياما تسكنى في منطقة فيها شخصية مهمة او يسكن في منطقتكوا شخصية مهمة يعنى مفيش حل.

يا لا بقي همتكوا معانا ندعي ان شخصية مهمة تسكن في منطقتنا تبقي الميه عندنا علي طول ومتقطعش ابدا محدش ينسانا في صلاته وفي اوقات الدعاء المستجاب يارب يديم علينا نعمة المية ويسكن شخصية مهمة في منطقتنا.

المهم اني عرفت ان النيل بخير

ودمتم بخير