الأربعاء، 20 فبراير 2008

حملة توسيع البنطلونات




صاحب الحملة ولد وليس بنت كمان

سمعنا كتير وقليل عن حملات واول مرة اسمع عن حملة لتوسيع البنطلونات مش عارفة ايه اللي خلي صاحب هذه الحملة يفكر فيها ،الموضوع اكبر من البنطلون واثاره السلبية علي المجتمع وعلي صحة الشخص (ذكر/انثى) وعن حرية الحركة مش ممكن اللي لابس البنطلون ده بيعرف يتحرك براحته . والموضوع مش فارق بين المحجبة واللي مش محجبة تلاقي الكل يلبس لبس يكشف اكثر مما يستر واللي لابسة الهدوم بليسة يعنى انا طول عمرى كنت فاكرة ان اللابيسة دى للحذاء فقط بس طلع لها استخدام اخر فلا مانع من البلوزة والجيبة والبنطلون او الفستان البادي كله كله حاجة يعنى تزهق تحس ان مفيش حاجة اسمها الصدق مع النفس يعنى انا محجبة اذا انا ملتزمة إلا انه يلاحظ العكس تماماً بداً من الحذاء اللي بيقول وسعولي انا جاية مينفش لان ربنا سبحانه وتعالي نهانا عن صوت الارجل" ولا تضربن بارجلكن ليعلم ما تخفين من زينتكن" فما بالنا بانهم يضعون كل الالوان التى في مكياجهن ودهبي علي الصبح وفضي ومترتر ومولد وتلاقي واحدة لبست حاجة الكل كانها كان عندها انفلوانزا واتعدوا كل الناس لابسه زى بعضها البادي والجنز المحزق ، الايشادو اللي بيلمع علي الصبح العدسات الملونة اشي اخضر وموف ورمادى كأن خلاص محدش عينه بنى او عيبة اللون البنى دلوقتى حتى الموبيل يا ناس لما موديل يطلع كله يمسك نفس الموديل ياربي هو مفيش عقل هو الناس بتتعامل بالشكل بس طب هو فايدة عقلنا ايه ربنا سبحانه وتعالي خلقنا وميزنا بالعقل ليه مش متخيلة ان بنات بالشكل ده في بيتها اب اخ ام بيسبها تنزل بالشكل ده ولا حول ولا قوة الا بالله العلي العظيم
الاخطر ان المحلات كلها لبس واحد والوان واحدة وموديلات واحدة مفيش حاجة مش ملفتة او لونها هادى غير ملفت .
كنت بسال ام من الجيران ازاى وهى المنتقبة ان بنتها تلبس البنطلون الساقط والجاكت القصير قالت لي هى المحلات فيها حاجة غير كده ولا الشوارع اعمل ايه.
وعقبال كده ما نسمع عن حملة لتوسيع الهدوم كلها ولا لالغاء المكياج ولو حتى في اماكن العمل والدراسة

الأحد، 17 فبراير 2008

قمر العيلة


ايوه ايه عمركوا ما شوفتوا حد بيدلع نفسه انا قولت اوفر عليكوا واغنى لنفسي بالفعل في مثل هذا اليوم من كام سنة -مش هقول اد ايه متهرجوش- بس اكيد مش من كتير اتولدت انا المدونة اللي اسمى شوية وشوية واصبح لعائلتى الكريمة قمر ينور لهم بالليل - مش يزن بالليل لا قدر الله- بس اكيد كنت طفلة طبيعة وميكونش اللي بناتى عاملينه فيا ده تخليص حق لمامتى وبابتى.

اصدقائي الغاليين عملوا لي عيد ميلاد يوم الخميس وكان جميل جزاهم الله خيرا

ووصلتنى رسائل جميلة جداً من اصحابي واخواتى وتليفونات بقي مقولكوش، الحمد لله الذى انزل المحبة في قلوبنا جميعاً لنسعد بعضنا البعض.

احلي رسالة مش هقول من مين انتو خمنوا:

اهديكي عمرى يا عمرى وقلبي لكي هدية

مقامك سما فوق السماء ونجومها ليكي هدية

كل سنة وانت طيبة

يا اعز واغلي ما لي

وعلي فكرة مخكوا ميروحش بعيد مش من زوجى لان احنا افعال لا اقوال زى ما بيقول

بس بجد حاسة بحب مالي قلبي بيكوا كلكوا وطايرة بيكوا

جزاكم الله خيراً علي كل شئ

احبكوا في الله

الجمعة، 15 فبراير 2008

مذاق مر لكن حلو

رميت روحى علي السرير وبحلقت للسقف هروبا من اى كلام ومحاولة منى لايجاد صفحة بيضا في عقلي كى لا افكر في شئ وافتكرت علي سلامة وهو بيقول في يوم كده بيبان من اوله لا تقدر تبتديه ولا تعرف تكمله وقولت في نفسي اه في اسبوع كده بيبان من اوله لا تقدر تبتديه ولازم تكمله

الخميس بالنسبة لي احلي يوم في الاسبوع لان بعده الجمعة والسبت اجازة الواحد بقي يستريح ويرمى كل شئ وراه ويعمل كل الحاجات اللي بيحبها ومحروم منها طول الاسبوع- لعدم توافر الوقت.

الجمعة دى كانت غير اخواتها من الجمع مرت عليا حاجات كتير حادثة- مستشفي-نقطة شرطة- قسم شرطة - نيابة- قسم شرطة تانى شد وجذب مع زوجى لانه اتضايق انى عملت شكوى واتصال القسم مرة تانية بيا علشان الشكوى وخوفه من ان الضباط يخدوها علي كرامتهم انى ارسل شكوى فيضايقونى واحساسي انى لازم اخذ حقي تفاعلات نفسية غير عادية مرت بي

وفي وسط كل ذلك عندى اختبارات في الفقه والعقيدة وعلوم القران وانا كنت مركزة في القرأن ومفتحتش ولا كتاب فكنت بتحايل علي اى معلومة تدخل من غير تعب
مش عارفة ازاى إلا انه بفضل الله تعالي خلص الاسبوع علي خير واحلى حاجة اكتشفتها ان النهاردة الخميس يعنى اخر الاسبوع ها اجازة
والاحلى ان المذاق المر لكل تلك الاحداث كان حل حلو التفاعل معها

الثلاثاء، 12 فبراير 2008

امنية

كان نفسي تقف جنبي
تشد ساعدى وتقولي عدي
الحق معاكي اوعي تسيبيه يعدي
دنيا ولا أخره.. هتاخديه
في الدنيا بأيديكي لو تقدري
في الاخرة لله سلمي
بس.... بعد ما تجربي
لا تستسلمي

الجمعة، 8 فبراير 2008

رسالة لدفع القهر عن المواطنين

تعرض لحادث امس ولانى مرهقة جدا بس عايزه احكى عليه بالتفصيل هأجل الكتابة عنه بس هدون الرسالة الالكترونية التى ارسلتها تعليقاً عما حدث لي من نقطة الشرطة مروراً بقسم الشرطة حتى النيابة والتى عنونتها ب(رسالة لدفع القهر)
السيد الوزير الفاضل/ حبيب ابراهيم حبيب العادلي
وزير الداخلية-جمهورية مصر العربية
السلام عليكم ورحمة الله وبركاته

سيدى الفاضل اعلم مدى المسئوليات والاعباء التى تقودها سياتكم واعلم ايضاً عن ان الخدمات التى تقدمها وزارة الداخلية متنوعة ومتنوعة ايضاً في نوعية الاشخاص التى تتعاملون معها فوزارتكم تتعامل مع جميع فئات الشعب المصري وبكل طوائفه فلاحتياج لوزارتكم من الكبير والصغير ولوزير والغفير والنزيه والحرامي والاشخاص الغير محترمة والمحترمة.
قررت الكتابة الي سيادتكم بعد تعاملي مباشرة وبصفة شخصية مع قسم الشرطة وانا لم ادخل قسم الشرطة مطلقا سوى لعمل صحيفة حالة جنائية مرة واحدة والبطاقة الشخصية القديمة هذا هو تاريخ تعاملي مع الشرطة.
اما ما حدث لي فكان غريب عليً ولا يمكن ان تخيل انه لا فرق في التعامل في اقسام الشرطة بين انهاء اجراءات حادث تصادم وانهاء اجراءات شخصيات مثل الحرامية وتجار المخدرات وفتيات الدعارة .
تعرضت يوم الخميس الماضي 7/2/2008 لحادث تصادم مرور شخص من امام سيارتى فجأة بعد تعديه للسيارة التى كانت بجانبي فاصطدم بسيارتى وانا في حالة نفسية سيئة وقفت السيارة مسرعة الى المصاب واتصلت من محمولي بالنجدة وبعد ثوانى تذكرت ان المستشفي علي بعد امتار فساعدنى الشهود علي ان الرجل هو المخطئ في حملة ووضعه داخل سيارتي وذهبت به للمستشفي الخاصة ودخل طوارئ وتم عمل اشعة مقطعية علي المخ واشعات علي جميع جسده وطالبتنى المستشفي 600 جنيه مقابل ذلك وسددتهم بالفعل ومكثت مع المصاب من التاسعة صباحاً حتى الثانية عشر ظهراً وتخيلى ان الموضوع انتهى بفضل الله تعالي لان المصاب وطبقاً لفحوصات والاشعات بخير وهذا ما كان يهمنى بالفعل واذا بي اجد المصاب يماطل حتى يحصل علي مبالغ مالية منى فما كان من امرى إلا انى اخبرت المستشفي بعمل محضر بالواقعة حيث انى اعلم يقيناً انى لسيت المخطئة وسوف اخذ حقي.
لن اطيل عليك سيدى سوى انى اعلمك انه في مراكز الشرطة التابعة لسيادتكم لا تجد سوى معاملة واحدة لامثالي من المواطنين والاخرين كما تحدثت سابقا ارباب السوابق وشبكات الدعارة والمخدرات.
لن تجد بعد يوم كامل من النقطة -حيث ان منطقتى لا يوجد بها قسم شرطة- الي قسم الشرطة وما ادراك كيف تقضي سيدة مثلي في قسم الشرطة -وما تسمعه من الفاظ لا تليق حسبي الله ونعم الوكيل- حتى ذهب الي النيابة المسائية في الثامنة مساء.
من الثامنة والنصف صباحاً حتى التاسعة مساء لك ان تتخيل وضعي وكيف اقضي حاجتى واتوضا واصلي .
لا اريد من مراسلتى هذا شئ سوى ان يصل صوت لسيادتكم ليقول يجب ان نفرق في تعاملنا مع المواطنين ليس كل المواطنين حرامية او تجار مخدرات او يملكون شبكات دعارة.

ان تغيير ثقافة شعب تجاه وزارة ما لا يتتطلب اعلانات في وسائل الاعلام عن خدمات الوزارة ومدى ما وصلت اليه تغيير ثقافة الشعب ينبع من الافعال التى تجبر الشعب علي تغيير ثقافته

عفوا للاطالة ولكن اعلم يقيناً انه سيتم عمل شئ ايجابي من سيادتكم تجاه امثالي من ابناء الشعب

ملحوظة: انشئت مجموعة علي موقع facebook اسمها نحو معاملة ادمية من الجهات الامنية للمواطنين انتم جميعا مدعوين للمشاركة وده اللينك http://www.facebook.com/group.php?gid=8139152471&ref=mf


الأربعاء، 6 فبراير 2008

عــــــــــدنـــــــــــــا

وحشتونى وحشتونى وحشتونى مش وردة لا بجد وحشتونى ووحشتنى المدونة بعد السمكة اللعينة ما اكلت الكابلات-ههههههههه اظن كلنا سمعنا عن هذه النكتة عن توقف الانترنت-
احداث كتيرة مرت وحابة اتكلم علي كل حدث براحتى اول حدث انى سافرت زى ما قولت قبل كده قبل ما تخلص اجازة نصف السنة وقضيت وقت الحمد لله تعالي يعتبر مريح يعنى بالعربي اكل ومرعى وقلة صنعة ودى حاجة نادرا ما تحدث لي حتى انى وزنى زاد في الاربع ايام دول بشكل ملحوظ الواحد مش متعود.

نزلت من الاجازة علي الطحن بقي كفاية كده راحة كان عندى اختبار القرءان في اواخر الجزء الثانى من سورة البقرة الحمد لله عدى علي خير وسمعت كويس بفضل الله تعالي.

بدأت اجهز للفصل الدراسي الثاني مقولتلكوش ان سلمى المجرمة جابت 92% وده يعنى انتصار غير عادى ليا علي كسلها في المذاكرة الحمد لله.

اهم حاجة بقي الزغلول الكبير معرض الكتاب

اه والله يوم الجمعة اللي فات مروحتش جنينة الحيوان انتو دايما كده مستعجلين روحت المعرض وكنت مخططة انى اشوف غادة عبد العال وابارك لها علي النونو- الكتاب- واهنى وابارك واجيب الشربات بس يا خسارة زوجى حبيبي اظاهر خاف اقابلها ونعمل بقي زعماء وجمعيات وهو عارف دماغتنا سوف بفتح السين في الموضوع حتى انه ودانى المعرض الساعة 7 مساء وهو متأكد انه بيقفل بدرى بس علي مين روحت برده.

جريت علي جناح السعودية قبل ما يقفل في محاولة لمعرفة اخر اصدارات الشيخ سلمان العودة لحبي الشديد لفكره ولكن لم ارى سوى مجموعة عن فقه الطهارة ولانى اقتنى اكثر من مجلد عنه لم اشتريه وفضلت ان احتفظ بالفلوس لاشترى ما اريد عنها فضلت طول المعرض ادور علي كتاب لابي زر القلموني اسمه عون الرحمن في حفظ القراءان ليساعدنى في حفظ المتشابهات في القران بناء علي نصيحة صديقة في الله المهم لم احصل عليه وطفت علي كل الصالات يعنى اللي استطعت انى ادخلها دون جدوى.

الكنوز التى اشتريتها من المعرض النصيب الاكبر كان للدكتور عائض القرني :
التفسير الميسر اد ايه لغته سهلة وجميلة لمن يبدأ في معرفة التفسير ولاطفالنا كطريق اول لهم
اشراقات مجلد به من كل بستان زهرة يعنى من اجمل ما كتب الدكتور ررررررررائع
الشوارد يلم شوارد الابيات وجوامع الحكم المستخلصة من بطون الكتب
استمتع بحياتك للدكتور/ محمد العريفي
السلسبيل لراحة البال لسلوى بنت فرحان
الاسلام والاخر من يعترف بمن؟ومن ينكر من؟ للدكتور / محمد عمارة
مختار الصحاح عشت معاه بقي طول الليل اجرد الكلمة واجيب اصلها واطلعها منه
كتيب رررررررائع عن متون النحو وكتيب اخر عن العقيدة
من الاخر فلست بس كنت عايشة احلي ساعتين في حياتى وسط الكتب والقراءة من كل كتاب شوية كأنى بدوق الاول
سؤال بساله لنفسي من يوم ما عرفت المعرض هو ليه بيعملوه في الشتاء يعنى احنا نقدر نغير ميعاده هو مش عيد ولا رمضان بدل المشي في البرد والمطره واليوم اللي بيخلص قبل ما يبتدى يا جماعة هو عيب يعنى لو غيرنا ميعاده يبقي في الصيف واليوم معانا من اوله والجو مش برد ويكون كانه نزهة
ايه رايكم نضم اصواتنا لاصوات بعض ونطالب ان يقام المعرض في الصيف؟ من يؤيد..........