وحشتونى وحشتونى وحشتونى مش وردة لا بجد وحشتونى ووحشتنى المدونة بعد السمكة اللعينة ما اكلت الكابلات-ههههههههه اظن كلنا سمعنا عن هذه النكتة عن توقف الانترنت-
احداث كتيرة مرت وحابة اتكلم علي كل حدث براحتى اول حدث انى سافرت زى ما قولت قبل كده قبل ما تخلص اجازة نصف السنة وقضيت وقت الحمد لله تعالي يعتبر مريح يعنى بالعربي اكل ومرعى وقلة صنعة ودى حاجة نادرا ما تحدث لي حتى انى وزنى زاد في الاربع ايام دول بشكل ملحوظ الواحد مش متعود.
نزلت من الاجازة علي الطحن بقي كفاية كده راحة كان عندى اختبار القرءان في اواخر الجزء الثانى من سورة البقرة الحمد لله عدى علي خير وسمعت كويس بفضل الله تعالي.
بدأت اجهز للفصل الدراسي الثاني مقولتلكوش ان سلمى المجرمة جابت 92% وده يعنى انتصار غير عادى ليا علي كسلها في المذاكرة الحمد لله.
اهم حاجة بقي الزغلول الكبير معرض الكتاب
اه والله يوم الجمعة اللي فات مروحتش جنينة الحيوان انتو دايما كده مستعجلين روحت المعرض وكنت مخططة انى اشوف غادة عبد العال وابارك لها علي النونو- الكتاب- واهنى وابارك واجيب الشربات بس يا خسارة زوجى حبيبي اظاهر خاف اقابلها ونعمل بقي زعماء وجمعيات وهو عارف دماغتنا سوف بفتح السين في الموضوع حتى انه ودانى المعرض الساعة 7 مساء وهو متأكد انه بيقفل بدرى بس علي مين روحت برده.
جريت علي جناح السعودية قبل ما يقفل في محاولة لمعرفة اخر اصدارات الشيخ سلمان العودة لحبي الشديد لفكره ولكن لم ارى سوى مجموعة عن فقه الطهارة ولانى اقتنى اكثر من مجلد عنه لم اشتريه وفضلت ان احتفظ بالفلوس لاشترى ما اريد عنها فضلت طول المعرض ادور علي كتاب لابي زر القلموني اسمه عون الرحمن في حفظ القراءان ليساعدنى في حفظ المتشابهات في القران بناء علي نصيحة صديقة في الله المهم لم احصل عليه وطفت علي كل الصالات يعنى اللي استطعت انى ادخلها دون جدوى.
الكنوز التى اشتريتها من المعرض النصيب الاكبر كان للدكتور عائض القرني :
التفسير الميسر اد ايه لغته سهلة وجميلة لمن يبدأ في معرفة التفسير ولاطفالنا كطريق اول لهم
اشراقات مجلد به من كل بستان زهرة يعنى من اجمل ما كتب الدكتور ررررررررائع
الشوارد يلم شوارد الابيات وجوامع الحكم المستخلصة من بطون الكتب
استمتع بحياتك للدكتور/ محمد العريفي
السلسبيل لراحة البال لسلوى بنت فرحان
الاسلام والاخر من يعترف بمن؟ومن ينكر من؟ للدكتور / محمد عمارة
مختار الصحاح عشت معاه بقي طول الليل اجرد الكلمة واجيب اصلها واطلعها منه
كتيب رررررررائع عن متون النحو وكتيب اخر عن العقيدة
من الاخر فلست بس كنت عايشة احلي ساعتين في حياتى وسط الكتب والقراءة من كل كتاب شوية كأنى بدوق الاول
سؤال بساله لنفسي من يوم ما عرفت المعرض هو ليه بيعملوه في الشتاء يعنى احنا نقدر نغير ميعاده هو مش عيد ولا رمضان بدل المشي في البرد والمطره واليوم اللي بيخلص قبل ما يبتدى يا جماعة هو عيب يعنى لو غيرنا ميعاده يبقي في الصيف واليوم معانا من اوله والجو مش برد ويكون كانه نزهة
ايه رايكم نضم اصواتنا لاصوات بعض ونطالب ان يقام المعرض في الصيف؟ من يؤيد..........
هناك تعليقان (٢):
السلام عليكم و رحمة الله و بركاته
حمدالله على السلامه
فعلا لك وحشه( بفتح الواو)
القرأه شىء جميل جدا و خاصتا لو كانت موسوعيه فى كل شىء،فهى عاده جميله مفيده للوقت و العقل و الذاكره و الأدراك و المعرفه و التعلم.
أنا معك ان من الفضل إقامة المعرض فى الصيف بوقت أطول من اسبوعين، حيث الجو صيفى مريح و المدارس اجازه و خاصتا بعد ما زهبت للمعرض يوم السبت الذى كانت تمطر فيه بغزاره و هو ثالث يوم فى المعرض و طبعا اخذت دش محترم و جالى برد بشده و حتى الأن صوتى مبحوح و لكن الهم من كل ذلك هو ما رأيته من تساقط المطر فى صالات العرض على الكتب و البائعين يجرون لتغطيتها بالكراتين و الأكياس البلاستيك و بهدلة و تلف الكتب نتيجه لعدم صيانة اسقف الصالات من الهيئه المسئوله و هى السمه المصريه المعتاده فى كل شىء من اهمال الصيانه.
مرة اخرى لك وحشه
و السلام عليكم و رحمة الله و بركاته
جزاك الله خيرا وفعلا اقتراح جميل لان القراءة غالبا ما تحتاج لوقت وهدوء وراحة بااااااااااال والكنوز اللي شريتها من المعرض كتب رائعة تقريبا عندي كلها شكرا جزيلالالالالالالالالا
إرسال تعليق