كراكيب نفسية

بما ان امبارح والنهادة هما يومين التنفيض والمسح والتنظيف والذي منه, وبما ان الفرق والمميز الجمعة دى كان انى كمان نزلت لبس الشتاء وطلعت اللبس الصيفي للبنات وكده. وفي غمرة العمل الشاق افتكرت حاجة مهمة جدا ان زى ما فيه كراكيب منزلية -ولمن لا يعرف لفظ الكراكيب هى الاشياء التى لم تستخدمها لفترة ممكن تكون في احتياج لها او لا وبعض المعلومات تؤكد ان هذه الفترة خمسة اشهر- اكيد فيه كراكيب نفسية زى ما كل شوية نرتب الدواليب والجزامة والمطبخ اكيد لازم كمان نرتب نفسيتنا يعنى ممكن تكون في شخصيات في حياتك لازم تتخلص منهم لعدم وجود دور لهم فيها او عادات لازم تتخلص منها او تستخدمها وبقالك فترة ناسيها او افكار عليك بتنميتها واخرى عليك بالتخلص منها وكده زيها زى كراكيب السندرة مع انى عمرى ما كان عندنا سندرة بس سمعت عنها .

او هواية قديمة جدا بقالك كتيرررررررر ممارستهاش ونفسك تمارسها تروح تجيب الادوات الخاصة بها وتفتكر وتحدد وقت انك تمارسها وممكن يكون فيه البوم صور قديييييييم نفسك تتفرج عليه تانى لتعيد ذكريات في حياتك سواء كانت سعيدة او لا تقوم تجيب الالبوم وتعيد الذكريات من تانى وممكن يكون فيه صديق افتكرته ولقيت نمرته وبقالك كتير مكلمتهوش اتصل به ودردش معاه. ده نفس اللي حصل لي.

وبالصدفة لقيت فيه كركوبة كده علي جنب نفسيتى وضحك لدرجة فظيعة وهي عبارة عن كشكول من عام 1991 هسيبكوا انتو تحسبوا عمره قعدت اقراه رجعنى ورا لكتييييير بس فكرنى بحاجات في شخصيتى كنت نسيتها وباحداث ولا فاكرة منها حاجة ولقيت معاه نمرة تليفون لصديقة كنت بدور علي رقمها من فترة طويلة ولما كلمتها فرحت جداً لما عرفت اخبارها وانها اتجوزت زميل لنا كانت تحبه وانجبت ولد وبنت ظريفة الكراكيب برده.

كمان كركوبة جميلة لقتها وهى ظرف قماش يابانى كان مهدى لي وبه كارنيهات الجامعة وكارنية مكتبة الجامعة والمجلس الثقافي البريطانى وعملات ورقية مكتوب عليها اهداءات من حولي عشرين سنة يابوى والله.

وكركوبة كمان عن ناس مش ناس محبتش تفضل موجودة معايا فتخلصت منها.

اه حلو بردة انه يكون فيه كراكيب نفسية تطلعها وتستعملها وتتفتكرها وترجع لها في اوقات تحتاج لها والكراكيب اللي مالهاش لازمة تتخلص منها بسرعة.