السبت، ٤ أكتوبر ٢٠٠٨

إنا وجدنا آباءنا على أمة وإنا لآثارهم مخالفون -الله المستعان

مش عارفة ازاى يجتمعوا مع بعض العيد والمقابر ،هى دى الاعراف والعادات ، أه ........لو كان العرف والعادات رجلاً لقتلته ، الحمد لله انا بالفعل قتلتهم في نفسي الحمد لله الذي هدانا لهذا وما كنا لنهتدى لولا ان هدانا الله ، ولكن كيف اقتلهم في اهلي هدانا الله جميعاً لما يحب ويرضي وهم الذين شربوا هذه العادات شرباً حتى صارت هى وهم واحد وكل ما نقول قال الله وقال الرسول يقول مش صحيح ايه اللي انتو بتقوله ده احنا طول عمرنا بنعمل كده بلاش كلام فاضي اصبح الحق الذي معنا كلام فاضي وهم كلامهم اللي مليان.

في كل مناسبة طبعاً واحنا المناسبة اللي عندنا حالياً ان فيه حالة وفاة رحمة الله وادخله فسيح جنياته بدأت من الخميس والاربعين وهلما جرى اتوفقنا في الاربعين واقنعناهم اننا نعمل مجلس علم عسي ان نفوز بتأميم الملائكة ودخولهم البيت ويذكرنا الله في ملئ خير منا والحمد لله وافقوا وتم وكل هذا بفضل الله وبالأية الكريمة


{بل قالوا إنا وجدنا آباءنا على أمة وإنا على آثارهم مهتدون}


اللي مش قادرة اعمله ومقدرتش اعمله انى اخليهم ميروحوش المقابر فى الاعياد ازاى يعنى يسبوا الميت لوحده ويقول عليهم ايه نسيوه لا يمكن ابداً ، وكمان التربي بياخد فلوس في الوقت ده لحسن يعمل حاجة في المدفن (طبعاً ده كلامهم)


فأصبح الناس في العيد فرحانين ويدعوا لبعضهم بتقبل الطاعات وهم رايحين المقابر ودموع للركب وقهرة ولا كأنه عيد
يا ناس يا هو حد يسمع الكلام حد يفهم الكلام حد يقول لهم انا خلاص بنفخ في قربة مقطوعة (شكلي كده)

حالى رافعة لافتة مكتوب عليها :

إن التعلق بموروث الأباء والأجداد قال الله تبارك وتعالي عنه {وإذا قيل لهم اتبعوا ما أنزل الله قالوا بل نتبع ما ألفينا عليه آباءنا" فرد عليهم بقوله سبحانه: "أولو كان آباؤهم لا يعقلون شيئا ولا يهتدون}

حد عايز يقتلهم معايا؟!

هناك ١٨ تعليقًا:

romansy يقول...

اول تعليق


محــــــجــــــوز


ل


رومــــــــــانـــسى

romansy يقول...

بيقولوا ان دى عادات وتقاليد
يارب بقى يغيروها بس دا صعب قوى
هما بيعتقدوا نه بيوصل رحمه للميت
بس الصراحه مش عارف ان كان دا صح ولا غلط
فيه بعض الناس بتقول صح
بس الله اعلم

عصفور المدينة يقول...

وصيك باللين والحكمة والتفكير في الوسايل المبتكرة للإقناع والدعاء

mohamed ghalia يقول...

اللهم اهدى عصاة المسلمين
وارفع الغمة وارهم البدعة وابعدهم عنها.
زيارتى الأولى
كل سنة وحضرتك طيبة
تقبلى تحياتى وإعجابى بالمدونة

شوية قهوة يقول...

البوست جميل جدا واتمنى انك تزور مدونتي انا لسة جديدة وعيزة تشجيع عشان اكمل شكرا

غير معرف يقول...

آه و الله
دى حاجة تقرف (أصلى كنت بضطر أصحى كل يوم الصبح عشان أنزل مع جدو)
ههههههههههههههههههههه
لا بجد أصل الناس الكبار دول لما بيكبروا على حاجة بتبقى خلااااااااص مقتنعين انها صح 100%
طب و الله مرة قلت لجدو بلاش و حرام و كدة بهدلنى و انتى عارفة غن جدو عمره ما بهدلنى قبل كدة قعد يقولى هو إيه اللى حرام يعنى ننسى اهلنا فى العيد يعنى و بعدين ما الرسول قلنا زوروا المقابر بلا كلام فارغ بقى
اهوه أنتوا كدة تسمعوا أى كلام من أى حد و تيجوا تقولوه و خلاص أبقوا أتأكدوا من اللى أنتوا بتقولوه قبل ما تنقلوه

FadFadA يقول...

عليكي باللين و الحكمة
و لو كنت فظا غليظ القلب لانفضوا من حولك

و بالنسبى لعملية القتل ... توكلي على الله و احنا معاكي

محمد

أنسانة-شوية وشوية يقول...

رومانسي
يارب نغير ونتغير لا طبعا مبيوصلش لان الرسول عليه الصلاة والسلام قال (اذا مات ابن ادم انقطع عمله الا من ثلاث علم ينتفع به ولد صالح يدعو له وصدقة جارية)
يعنى الدعاء من اى مكان هيوصل لهم مش لازم نروح يوم العيد والخمسان وخلافه
جزاك الله خيرا

أنسانة-شوية وشوية يقول...

اخى عصفور المدينة

الله يكرمك ياريت تدعى معايا ان ربنا يوفقنى
والله ربنا يعلم انا بكون صبورة معاهم ازاى بس الردود بتخلي الواحد لولا انه بيدعوا لله كان زمانه طق

أنسانة-شوية وشوية يقول...

اخى محمد

اللهم امين يارب ارنا الحق حق وارزقنا اتباعه وارنا الباطب باطلا وارزقنا اجتنابه

أنسانة-شوية وشوية يقول...

مقتطفات من حياة طفلة

جزاك الله خيرا علي تعليقك الجميل

أنسانة-شوية وشوية يقول...

انا ودماغي
عارفة طبعا حضرت كتير حوارات من دى مع جدو
ربنا يكتب لنا الخير جميعا

أنسانة-شوية وشوية يقول...

اخى محمد-فضفضة

اخيرا انت فين بقالك اكثر من خمس شهور -خضتنا عليك

والله لا تتخيل اد ايه الواحد بيكون صابر لان في النهاية دى مش مسألة شخصية بينا وبين بعض احنا نرجو ابتغاء وجه الله تعالي والخير للجميع

بس بتكون حوارات تحرق الدم ربنا يلهمنا الصبر

نـــــــور يقول...

السلااااااام عليكم

انا جييييييت .. ازيك يا غالية وحشاني كمان

.....

فعلا لو كانت العادات والتقاليد رجلا لقتلناها!!

لسة امبارح كنت عند عمتي .. بنكلم بنت عمتي علشان تيجي نسلم عليها لاقيناها واخدة بناتها ورايجين المقابر عند باباهم "المتوفي"!

يعني بجد حاجة تقطع القلب بنات صغيرين اطفال تعمل فيهم ليه كدا!! دا العيد فرحة ورسولنا امرنا بإننا نفرح .. مش نزور الاموات!

الله المستعان..

الطائر الحزين يقول...

عارفة حضرتك

ان والدى رحمة الله عليه
توفاه الله فى العشر الاواخر من رمضان فى السنة الفائتة

وكسرت عادات كثيرة بفضل الله واشياء لرفع الحرج عن الناس والجيران للفرحة بالعيد
اولها منعت الجميع بالذهاب للمقابر باللين تارة وبعض الشدة تارتين
والجيران تعمدت انى اشترى كعك من الخارج واهدى بعض الجيران منهم

ليس كل ما يمشى عليه الآباء نخالفة
أن وجدنا آباءنا على عادات محرمة ونا على أثارهم مخالفون
بعون الله

ibn_abdel_aziz يقول...

هذا وانتي تتحدثين عن عرف ربما لا يظلم أحدا ..بمعني انهم قاموا بما قاموا به حبا للميت ومشاركة له في السعادة بالعيد ايمانا منهم بان الميت يسمع سلام الحي

انا ضد هذه العادة بالطبع وبالتاكيد لا اؤيدها بحال الا اني اتفهم كيف وصلنا لها بل ازعم انها ربما عادة لاتجور علي حق أحد
فهي تظل في عداد البدع

فما بالك بعادات تظلم وتقهر وتسحق وتقتل وتخنق ؟؟؟؟
اسمحي لي ان استعير عنوانك لهذا البوست لأقول
"إنا وجدنا آباءنا على أمة وإنا لآثارهم مخالفون "
في هذه المواطن :
ويسئلونك عن العرف ...عندما يأمر العرف بالحرام وينهى عن الحلال
http://justice4every1.blogspot.com/2008/10/blog-post_1197.html

جزاكم الله خيرا

غير معرف يقول...

POTY
لالالا ملكيش حق جربى كده تزورى المقابر فى العيد حاجه تفرح خالص حاجه ترد الروح خدى معاكى خوص ورد هديه للميت و قرصين رحمة و شريك لالالالا بتتكلمى فى إيه ملكيش حق خااااااااااالص
و لا شقاوة الأطفال الحلوين و هما جايين ياخدوا بالرحمه فلكلور شعبى يجنن
أمال العيد يبقى عيد إزاى مش لازم نعيد على الميت قبل الحى إنتى عاوزهم يزعلوا منا .........
أستغفر الله العظيم و أتوب إليه

غير معرف يقول...

ممكن اقتلة معكى مش العيد بس دة كمان فى رمضان ممنوع نفرح ونعلق الزينة علشان مايصحش كدة الناس تقول اية فرحنين فى رمضان ويوم العيد الصبح الاطفال بيروحو معى الاباء رحلة بقى وناخذ الكورة معنا علشان نعمل جو للميت وناخذ قرصين رحمة ونور ياست هو دة العيد انا جاية معاكى ومعاية سكينة او حبل او شكوش علشان اموت هذة العادات وربنا يرحمنه


قطتى