الخميس، ٢٤ يوليو ٢٠٠٨

شملولة والزبادى


اعتادت نفسي علي ما اجبرها علي فعله من آن لآخر ترفض اجاهدها تعصانى وهكذا الحال بينى وبينها وخصوصاً في فعل الاشياء التى لا تحبها (دائماً غسيل المواعين) ولكن دائماً اجتهد لتحقيق هدف ما ...أحاول مهما حاول الاخرين اثنائى .. لا اترك اليأس يتسرب إلي قلبي وعندما انجح احاول مجدداً أعلم ان التوفيق بيد الله تعالي والعمل بأيدينا.

كل هذا دار بينى وبين نفسي وانا بتشملل واعمل الزبادى في البيت ولفظ شملولة والفعل يتشملل هو مش فاكرة لمين بالظبط في العائلة التى دائماً ما كان يقول اتشمللي واعملى.

انا اتشمللت يا جدعان ايوه اتهريت عمل زبادى مرة واتنين وتلاتة واربعة مرة مزز زيادة ومرة خفيف زيادة ومرة جامد زيادة وكل مرة اقول يمكن الخميرة مزة، طب يمكن سيبتة فترة اطول ، طب يمكن فترة أقصر، طب اللبن يمكن سخن شوية أو فاتر شوية ياربي

إلي ان جاءت أخر مرة وقولت مش هعمل زبادى بعدها تانى لو مطلعش حلو( مش عايزة اقول لكوا شماتة ابلة ظاظا بقي فيا شكلها ايه).

قشطة مش مصدقة نفسيتى ايوه طلع حلو وفي كل الظروف المذكورة عاليه هى نفسي اللي كانت عايزة تزهقنى ومعملش زبادى تانى بس انتصرت عليها واتشملت وعملت الزبادى علي مين يا حلوة

بما انى شملولة يبقي اديكو بقي الطريقة لمن أراد عمل الزبادى بعدى:

كليو لبن دافئ، ملعقة زبادى جاهز(هى دى الخميرة) يخلط جيداً مع اللبن وتضعها في اكواب صانعة الزبادى وتتركها من 3-4 ساعات وبيا والشفا

اللي معندهوش صانعة زبادى يحط الخليط في فخارية في فرن دافئ حتى يتماسك

واللي مش عايز يعمل الزبادى في البيت يشترى من عم عبده اللبان

وتبقوا شماليل زى

هناك ٢٠ تعليقًا:

غير معرف يقول...

ههههههههههه
أنا عاصرت حوار الزبادى ده و أخر حاجة عرفتها أنه خلاص مينفعش على راى سعد زغلول مفيش فايدة يا صفيه
برافو يا شملولة بس أنا لازم أتاكد بنفسى و تعمليلى واحد:)

سمر الشافعى يقول...

والله ياشيخه دا الناس دول عليهم تقاليع توجع القلب يعنى الشملله ماتجيش الا فالزبادى نقعد نغلى اللبن ونحط خميره وندفىى ونستنى طب على ايه ماتشتريه جاهز وخلصنا بعد كدا ماتسمعيش كلام حد يقولك اتشمللى

بس عالعموم تسلم ايديكى ياجميل واكيد اى حاجه تعمليها هتطلع زى العسل من ايديكى

blue-wave يقول...

هههههههههههههه
والله انتى دمك زى العسل
انا مبسوط انى دخلت المدونه دى

http://kasperb4.blogspot.com/ يقول...

اقولك على حاجة بصراحة
انا قبل ما ارا الموضوع كده نفسي راحت للزبادي اوي والله م الصورة اللي حاطاها دي
فانا هستأذنك اقوم اجيب واحدة كده ع السريع آكلها
وبعدين ابقا اجي تاني اقرا البوست
D:
------

عندي نشيد ع المدونة حلو اوي وبحبه جداا
ياريت حضرتك تسمعيه وتقوليلي رأيك فيه

غير معرف يقول...

السلام عليكم و رحمة الله و بركاته
friend

الى أن أرد
هذا قصر ذيل يا .......شملوله
ولآأقولك دا قصر زبادى


و السلام عليكم و رحمة الله و بركاته

موناليزا يقول...

الف هنا وشفا
وربنا يكرمك على الطريقة وان شاء الله هجربها

Unknown يقول...

ياسلام ايه الشطارة دى مش متعودين منك كده بس خلى بالك رمضان قرب وبيحلو الزبادى وقولى لنا كل شوية على أخر أخبار الست الشملولة

أنسانة-شوية وشوية يقول...

انا ودماغي

ايوه عاصرتيها بس مدوقتيهاش
ههههههههه

أنسانة-شوية وشوية يقول...

سمر الشافعي

علي رأيك تقاليع، بس هى الحكاية بتبدأ بالذبادى

أنسانة-شوية وشوية يقول...

بلو ويف

والله انا اللي مبسوطة انك مشرفنى ومبسوط الله يكرمك ومستنياك دايماً

أنسانة-شوية وشوية يقول...

محمود

الف هنا وشفا، مش مهم الطعم بس ايه رايك في النظام.ههههههههههه اكيد طبعا هشوف النشيد واعلق عليك

أنسانة-شوية وشوية يقول...

فرند

همشيها قصر زبادي، تنزل المرة دى

أنسانة-شوية وشوية يقول...

عصفور المدينة

منورنى بفرح دايما وانت منورنى

أنسانة-شوية وشوية يقول...

موناليزا

الله يهنيكى والله الواحد بيتعب من كتر ما بيجرب، اطيعه محدش بياكلها بالساهل

أنسانة-شوية وشوية يقول...

ساسا

ايوه انت عارف طبعا شمللتى مع الفول والدماسة اللي اشتريتها ومعملتش فيها غير مرتين وقصرت السلامة بعدها(خوف علي البنات طبعا)

غير معرف يقول...

بصى ياانسانة طبعا بيحيكى على الزبادى الرائع اللى محدش ذاق منه حاجة وعلى العموم دى حكايتك انت والعهدة على الراوى بس ياريت تكونى شجاعة وتقولى رائى جوزك وبناتك كان اية زى رائهم فى الفول برضة ولا احسن شويهةاكيد طبعا جوزك معجب جدا بكل وصفات اكلك اللى بتوزعيها على اخواتك وخصوصا البيكاتا
من فضلك وبمنتهى الشجاعة اكتبى بوست عن رائى جوزك فى الزبادى ومش عاوزه تزويغ
نور الفجر

غير معرف يقول...

ياعيني يا عيني علي الزبادي اكيد جامد و اوعي ابلة ظاظا تشمت فيكي و لا يهمك يا قمر الله المهم النفـــــــــــس و لا اي نفس امال احنا بنهرج , و بعدين المفروض كدة تعملي بارتي علي الزباااااااادي علشان ندووووووووووووووووووق
اعتقد كدة يا نؤتي ان شملولة دي بتاعت بابا" - بامارت صنية الرقاق-"
Shimo

Bitter marzipan يقول...

مدوّنة جميلة

صحتييييين

انسااااااااانة....غريبة يقول...

ههههههههههه مبروك على الزبادى

ده كله فى الزبادى امال لو اتكلمنا عن المكرونة البشمل هتعملى ايه

اتشمللى بقى وورينا البوست الجديد حلو لفظ اتشمللى ده هقوله علطول وربنا يستر

وفعلا الطريقة صح احنا بقى بنعمل ايه بنجيب كيلو لبن مثلا ونغليه لحد ميبقى دافى بس مش لدرجة الغلى وتحطى عليه معلقتين زبادى وتقلبى كويس وتحطيه فى مكان دافى اوى وهو متغطى ومدفى فى حاجة يعنى لفى البرطمان بتاه فى قماشه او حاجة وسبيه مش فاكرة كام ساعة والله تقريبا 6 او اقل لحد ميمسك وحطيه فى التلاجة وبالهنا والشفا

غير معرف يقول...

طبعا شملولة وست الستات مش بنتى ماما حببتك