حتى لا تفطص غير المحطة

الفترة اللى فاتت كانت صعبة مذاكرة وامتحانات للبنات وحفظ وامتحانات عندى والتعب النفسي اللي عشناه مع احداث غزة وزيارة

المصابين اللي اصابنتى بذهول وعرفتنى ان الناس دى هم اللي عايشين مش احنا

قررت اخذت اجازة واغير كل محطات حياتى حيث لا سواد ولا كآبة ولا عقد نفسية ، حيث الحياة بلا عمل وبلا افكار مزعجة ، ولا تدوينات حزينة ، ولا جرائد ولا نشرات اخبار

،وافتح الباب علي مصرعيه للنكات الضاحكة والكوميديا الراقية والنزهات النيلية والغير نيلية

وغيرت المحطة ولا جرائد ولا نشرات اخبار ولا الجزيرةولا العربية ولا اى دراما محزنة اصل الواحد مش ناقص وتكبير دماغ بقي مع العيال وابو العلا( ابو العيال) اصل الاجازات مش بتتكرر كتير، حتى التدوينات المحزنة اعتزلتها، وبالصدفة دخلت

علي مدونة خمسة فضفضة ولقتها كاتبة بردة علي غير المحطة ، الفكرة حلوة جداً حتى لا نصاب بعد نفسية

الحاجة الوحيدة اللي معرفتش اغير المحطة فيها هى الاحلام كل يوم احلم بالشغل وحصل ايه ومشاكل وعمالة احل فيها ليه الخيبة دى بقي حاجة تضايق بس يكفينى انها احلام وليست حقيقة

نصيحة بجد الواحد من آن لآخر لازم يغير المحطة وإلا هيفطص

ممكن نخليها من الاقوال المأثورة

حتى لا تفطص غير المحطة