امورتى الحلوة في( KG1)

اليكم امورتى الحلوة اللي في KG1

بصراحة من فترة طويلة وانا عايزة اكتب عن امورتى الحلوة واعتقد انها هتيقي سلسلة من أمورتى لانهم اموراتى الحلوات الثلاثة بس انا هبدأ بالصغيرة كما سُئل أحدهم ذات مرة عن أحب أبنائه إلى قلبه، فأجاب: "الصغير حتى يكبر، والغائب حتى يعود، والمريض حتى يُشفى"، ايوة يعنى الصغيرة الجميلة واللي هتجب لي المورستان يعنى يا خلق انا اذاكر اولي اعدادى دراسات وعلوم وبعدها ادخل في أ-ب-ت والمشكلة ان البنية مش عاجبها تروح المدرسة وكل يوم مش عايزه اروح المدرسة اصلي مش عايزة اقف في الطابور ونروح المدرسة ونتحايل عليهم ميقفهوهاش في الطابور وبعد معاناة يوافقوا مع ان الطابور رائع وتفرح وانت بتتفرح علي العيال كده وهم واقفين ،تقوم الحلوة بعد كل ده تقول انا هقف في الطابور شغل عيال صحيح طبعا شكلنا كان فظييييييييع مخبيش عليكوا انا حسيت انى غلطت انى دخلتها المدرسة في السن ده يعنى هي هتكون اربع سنوات في فبراير الجاى بس خلاص بقي قضي الامر هحاول ازق علي قد ما اقدر السنة دى ، بس الجميلة فجأة لقتها بتقول مع نفسها كده كلام اركز شوية الاقيها بتقول سورة الاخلاص بتقولوا ايه ياولا اه والله بتسمع سورة الاخلاص زى العسل اقول قشطة لا طلعت مش غلطانة شكلها هتطلع قماش ، وبعدين كل يوم اروح الشغل متأخر علشان الست سارة ولما حد بسألنى اقول عندى kg1 يعنى ايه ...احكي الحكاية من اولها . واخر اليوم اقعد احكى حواديت واغنى حبيبة امها، وامورتى الحلوة يعنى كده اد خمس ست سبع مرات لما صوتى يروح والصداع يشتغل

المرة الجاية بقي للبكرية ونشوف عاملة فيا ايه

وعلي راي عمنا الكبير شوقي: فإن رحمت فأنت أم أو أب......هذان في الدنيا هما الرحماءُ