السبت، ٨ نوفمبر ٢٠٠٨

راية....بخ.. الله يسامحك يا فودافون

اتحدث اليكم ااقصد اكتب اليكم عبر الاتصال التليفوني وهحكى لكم علي اللي حصل . لما تصحى من النوم وتلاقي التليفون عطلان عادى وايه المشكلة بس ، لكن لما يتصلح التليفون وتلاقي النت عطلان وتتصل بالشركة محدش يعبرك تتصل بالسنترال تعرف ان سبب العطل ان شركة راية جت واخدت كل الكروت الخاصة بالـ دى اس ال علشان راية اتباعت بتقولوا ايه ياولاد راية اتباعت بتقولوا ايه ياولاد ايوه زى ما سمعتى وعلشان سيادتك مش بتفهمى عربي نغير طريقة الكلام شركة فودافون اشترت شركة راية.
طب وايه المشكلة هى الشركات لما بتتباع أو تشترى مش بشتروها بالعملاء بتوعها . اعتقد في حكايتنا أن الكلام مختلف
اتصلت بخدمة العملاء والتى لم تفيد سوى ان الست الموجودة تنصحك بالاشتراك مع فودافون يا ستى يهديكى يرضيكى انا من حقي اعرف قبل كل الكلام ده امال يعنى معاكوا ارقام موبيلات العملاء والبريد الاليكترونى وشبكة معلومات علشان ايه ومن حقي اختار الشركة اللي هتعامل معاها وبالطريقة اللي تناسبني
طب والله ما انا مشتركة معاكوا انتو وحشين وبتعاملونا معاملة مرات الأب انا هشترك مع شركة تانية
اتصلت بشركة تى ايه داتا والناس كتر خيرهم مكدبوش خبر وجم اخدوا اشتراك الشهر الاول وبعد يومين اتصلوا وقالوا ان البروتوكولات تمنع دخولهم للتركيب عندنا علشان احنا عملاء راية وهى البروتوكولات دى مفيش حاجة فيها عن العملاء طب يا سيدى يا ستى راية مفيش بح قالوا لا لازم تجيب رقم
الالغاء من الشركة يا عم الغاء ايه هو انا عندى اصلاً خدمة ولا حتى فيه شركة قالوا مينفعش
عنها واتصلت بالشركة وافادت الست المحترمة انى لازم املأ نموذج الالغاء واعيد ارساله لهم وهم متفضلين هيدونى الرقم وعملته وبعدها قالوا لا ده فيه فاتورة لازم تدفعها اقول لهم مستعملش الخدمة من ازيد من شهر لا مجيب
قولت يا بت لمى الدور وروحى ادفعى يمكن مزنوقين في شوية فلوس ولا حاجة واهو نساعد في شراء الشركة ويمكن يعتبرونا من المؤسسين أواحتسبي وكل جنيه ادفعيه قولي بعده 100 حسبي الله ونعم الوكيل ويارب محدش يشترك معاكوا وتبقي خلصت واحدة بواحدة
روحت ادفع في فونو قالوا الخدمة مقطوعة من عندنا، كان هيغماً عليا او الم عليهم شارع المعادى المحترم بناسه ،ولانى عارفة ان الصويت حرام ولانى مش عايزة اعمل حاجة حرام قولت اقضيها دعاء
فأنا بدعوكم معى للدعاء عليهم وعلي اللي خلاهم يعملوا فينا كده يعنى حتى الشركات اللي بندفع لها فلوس علشان تقدم خدمة تبهدلنا كده وتخلينا ولا بلاش
اخيرا وانا يعنى عاصره علي نفسي مشنة اللمون كله اتصلت بشركة فودافون وانا بعيط قولت انا عميلة لشركة راية سابقاً وعايزة اشترك معاكوا بس مش بمزاجى والله عصب عنى
بكاءءءءءءءءءءءء حادددددددددددددددد

هناك ٨ تعليقات:

الفقيرة إلى الله أم البنات يقول...

اتحرق دمى على الصبح واصلا الكومبيوتر عندى بايظ وبيشتغل كل كام يوم ولما بعتناه يتصلح الراجل كسرة وقال انه محتاج نغيره مش يقول انى كسرته Nسف
اجى للمهم
والله العظيم اتحرق دمى
شوفى يا انسانه يا حبيبتى
مشكلتك انك اتعاملتى مع صنف منتشر هذه الايام
وهو صنف قليل الادب وقليل الذمة
والله الواحد قرف منهم ومن كل حاجه
انا لومنك اشترى البتاع اللى بيقول عليه من اتصالات جاك بيرك فى الجهاز وتبقى على النت
مقدرش افيدك بس سمعت عنه
وكنت عاوزة ااقولك ان شركة رايه شركه تمثل
الشكل الطبيعى لحكومة بلدك
مهم بيبيعوا ويشتروا فينا ومش بيسالونا
عمرك شفتى فاتورة كهربا الصيف يفضلوا يحسبوك عليها طول الشتاء
مع الاخذ فى الاعتبار مش بشغل دفايه ولا تكييف علشان البيت معقول
شفتى عمرك فاتورة تليفون تيجى بارقام خياليه وانت اصلا مش بتتكلمى لان معندكيش وقت
يا انسانه انت وانا وكلنا بنتسرق
والله النهارده الصبح قعدت ادعى عليهم لما اتفقلت
على كلا اللى فى بالك
طولت عليك بسبجد ربنا معاك ومعانا

غير معرف يقول...

السلام عليكم ورحمة الله و بركاته
friend

هيا دى مصر يا عبله أقصد يا إنسانه( ممكن تغيرى الأسم من إنسانه إلى حيرانه )

عموما دمك خفيف


هنا على العالم عندما هنا على انفسنا
ودا هو سبب الأستخفاف بينا

و السلام عليكم و رحمة الله و بركاته

غير معرف يقول...

والله صعبتى عليه اوىوبكرة هاروح الحسين واقعد على الباب وادعو على راية وفودافون امامالسياح وها تبقى الدورارات واليورهات للركب علشان ندفع للشركة ونبقى من المساهمين بس متخديش الفلوس كلها سبيلى شوية وزى ما قالت الست الى انا معرفهاش يبقنتى اكيد فى مصر

قطتى

غير معرف يقول...

صعبانة على جدا والله ونفسى اساعدك بس عندى سؤال محيرنى مشنة اليمون اللى انتى عصرتيها على نفسك دى جبتيها منين وبعدين اللى يعصر ليمون يعصر لمونة او اتنين مش مشنة ولا ابو بلاش كتر منه0

نور الفجر

أنسانة-شوية وشوية يقول...

الغالية ام البنات

وحشانى المدونة منورة بوجودك، علي رايك الصنف ده انتشر هذه الايام انت عارفة انى مارست معاهم كل التعاملات الحسنى وغيرها دون فائدة وحتى الان معنديش نت
امسحى دموعم يا انسانة اهى اهى اهى دى دموع

أنسانة-شوية وشوية يقول...

فريند

ايوه هى دى معملة المصريين يا فريند

نعمل ايه بقي انا هحاول اعش امير الانتقام واول ما يركبوا النت انا بقي اتبغدد واقول لهم شيلوه مش عايزاه
قال يعنى بكرامتى
لك وحشة بجد متنسنيش بدعائك ، المقطم حلو بجد بس انت مش واخد بالك

أنسانة-شوية وشوية يقول...

قطتى

يا بنتى احنا عايزين امة محمد كلها تدعي عليهم يمكن ينفع

أنسانة-شوية وشوية يقول...

أما انت بقي يا نور الفجر

مش عارفة ليه بس بحس بسخرية يعنى مكنوش شوية ليمون بدهم لاخوكى الصغير اهو يا حبة عينى اشترى نص كيلو النهاردة بجنيه يعنى ينفع مصروف البيت ينقص جنيه