يقدروا علي كدب

طول اليوم امبارح وانا هتجنن اعرف ايه الاخبار وكل شوية اسأل في جديد يقولوا ان المحلات مفتحتش والشوارع فاضية خالص ، جندت كل الناس وعلي الماسنجر ايه الاخبار يقولولي التحرير بقي ثكنة عسكرية وممنوع اى اتنين يمشوا مع بعض وجه الجو واضرب هو كمان واعرب عن غضبه -صعب عليا الغسيل كنت ناشرة- المهم دخلت عند نوارة ولقيت عندها الاخبار طازة واتضايقت جدا لما عرفت انهم مسكوا محمد عبد القدوس -هذا الرجل احبه في الله- كانت هناك اقتراحات تهبط علي اذني من كل واحد معدى يمين شمال مثل ان الشعب يمشى في الشارع مترجل ويرتدى اللون الاسود من غير هتاف ولا اى حركة سوى المشي في الشوارع حتى يوصلوا الراسلة صح. واخرين يطالبوا بيوم اخر لعدم الخروج من المنزل وتعليق العلم المصري من النوافذ والشرفات - مش عارفة اشمعن العلم يعنى-
اتضايقت جدا عند سماعى احداث المحلة وقولت لا فين التحضر مش الهدف انهم يبوظوا الدنيا ،كل هذا من الانترنيت فقط ولم اسمع او أقرأ اى وسيلة من وسائل الاعلام سواء المصرية او العربية
وعند مشاهدتى نشرة التاسعة مساء وسماعى ان اليوم كان عادى جدا ومر مرور الكرام قولت في عقلي ايه ده امال ايه اللي سمعته وشوية وقريت مانشتات الاهرام اللي بصراحة اول ما قرأتها انفجرت من الضحك وحسيت ان اللي كاتب المانشت ده إما ساقط ابتدائية أو انه افترض ان اللي هيقرا الجرنال ساقط ابتدائية يعنى يدوبك بيفك الخط كلام لو رضيع قرأه هيقول من اللي مفبرك الكلام ده ويعنى المفروض يكون انصح من كده.
الاغرب لما شوفت نشرة الجزيزة بعد نشرة التاسعة همست في اذن زوجى هم بعد كل هذا الانفتاح الاعلامى ولسه بيقولوا كلام كذب وهبل ولا يدخل علي الاطفال علي الرغم انهم عارفين كويس ان القنوات الفضائية عند كل الناس واللي معندوش عنده وصلة يعنى الحقيقة هتوصل هتوصل فكرونى بالاعلام ايام النكسة.
ياه يقدروا علي كدب.... اما نشوف بقي التصريحات الاعلامية بتاعة المحليات هيقولوا عليها ايه علي الرغم انهم مش محتاجين يكذبوا لانهم واخدين 90% بالتزكية