الاثنين، ٧ يناير ٢٠٠٨

افكارى بعيد عن الصراعات والكآبة


كنت عايزة النهاردة اكتب عن اخر الكتب اللي قرأتها لانها جميلة جدا جدا جدا بشكل غير عادى ومفيدة جدا جد علي الرغم من اختلاف اتجاهاتها ولكنى فضلت انى اجلها الي التدوينة القادمة لانى وبعد الصراع النفسي العجيب الذي كان يعترينى وقراري انى مفكرش فيه خااااالص ومخليهوش محور تفكيري حتى اتخذ قراري بهدوء وتروى-ههههههههه بقالي 3 سنين بس بحاول اخذ القرار- شر البلية ما يضحك بس وعنها واثرت السلامة مع نفسي وفضلت انى اعمل حاجات تانية المهم طولت عليكوا عنها

الاول: روحت انا وزوجى نزور صديقه اللي لسه راجع من الحج فرصة انا بحب زوجته جدا احسبها علي خير ولا نزكى احد علي الله واول ما وصلنا للعمارة لقتها عمارة عالية جدا وعرفت منهم ان صاحبة العمارة انشات الدور الاخير في اجازة العيد حتى لا يكون احد من الحى موجود وطبعا العمارة مخالفة بسبب الادوار الزيادة قولت لهم ازاى تسكتوا يعنى لسه ظازة حادثة عمارة الاسكندرية وهتلاقوا المسئولين في الاحياء خائفين ضحكوا ضحكة جامدة جدا وقالوا ان بنت صاحبة العمارة فاتحة مكتب هندسى في العمارة وكل الحي في جيبها يعنى العوض علي الله طب انتوا هتسكتوا طب ونعمل ايه... يعنى ايه تعملوا ايه تقوموا الدنيا ومتقعدوهاش لا دى ارواحكوا وارواح ولادكوا بس محدش هيعمل حاجة لان كل ساكن بيعتمد علي الاخر ولا احد يتحرك ...

فتحنا سيرة التعليم والخيبة اللي احنا فيها وان ولا تعليم خاص ولا عادي ولا لغات ولا ازهري نافع وكل الناس مش عارفة تعمل ايه تفتح الشباك ولا تقفله اليوم مش بيقضي مذاكرة ولا عمل واجبات والمناهج اللي زى الزفت والمدرسين والدروس الخصوصية يعنى تقليب مواجع وضغط علي الجرح بالجامد ووصلنا ان الاسر مقسمة الي قسمين قسم واخد الحكاية جد جداً وطالع روحه في دروس خصوصية ومذاكرة ولاغي الحياة للعيال خالص والاخر مكبر دماغه خالص برده وبيقول كله محصل بعضه برده نفتح الشباك ولا نقفله

الثانى: انشغلت في امتحان القراءن الكريم لان الجزء الثانى ملئ بالمتشابهات اللي لايمكن ستحضرها إلا وانت عارف المعنى ومركز فيها كويس واشتغلت بالورقة والقلم والتفسير حتى اديت بفضل الله تعالي الامتحان علي خير، واحلي حاجة انى فعلا عرفت ان العلم لازم ياخذ بالقوة والتشمير (خذ الكتاب بقوة) ربنا يكرمنا جميعا

الثالث: امتحانات نص السنة علي الابواب وانا بقي عندى سادسة ابتدائي يعنى شهادة يا ناااااااااااس اعمل ايه

كل افكارى دلوقتى متجهة الي امتحانات نص السنة وكيفية قضاء الاجازة لتعويض البنات ع الفترة اللي بغيب فيها عنهم ودى بصراحة الافكار اللي خرجتنى شوية من الصراع اللي انا فيه..اسالكم الدعاء وعلي راي بنت خيخة واى كلام ابقوا اتوضوا قبل ما تدعوا

اه نسيت اقول لكوا ان الامورة اللي في فوووووووووق في الصورة دى انا وانا بفكر



هناك ٦ تعليقات:

DR.HAMAS يقول...

ربنا يعينك يا أختنا على اللى انتى فيه

بين امتحان قرآن و ثواب عظيم

و متابعة ابناءك و دراستهم

و مشاكل التعليم

صراحة ربنا يكون فى عونك

بس اللى عاجبنى ان كل اللى بتفكرى فيه حاجات من وراها ثواب عظيم

حتى الانشغال بمشاكل أمتنا

((من لم يهتم بأمر المسلمين فليس منهم))

فبصراحة ربنا يكرمك

و جميل ان الانسان يعيش

و كل ما يشغل باله

هموم كلها عليها ثواب من الله

ربنا يجركى خير

أكرمك الله


د.حمــــــاس

الفقيرة إلى الله أم البنات يقول...

أم البنات..انسانه
ليك عندى تااج ياريت تيجى تاخديه

غير معرف يقول...

السلام عليكم و رحمة الله و بركاته

كان الله فى عونك
واعاننا عليكي

لما قرأت الموضوع حسيت ان الكلام راح منى و نسيته من غير ما عينيا تيجى فى عينيكى

السلام عليكم و رحمة الله و بركاته

أنسانة-شوية وشوية يقول...

دكتور حماس
سعيدة بتعليقاتك جزاك الله خيرا

ام البنات

الله يكرمك يا حبيبتى ان شاء الله اخذ التاج بعد ما اخلص الامتحان شكرا علي اهتمامك وهو تاج جميل فعلا

فريند
حلوة اوى ضحكتنى وانا موافقة ربنا يعينكوا عليا

semsem brens يقول...

hiiiiiiiiiiiii

semsem brens يقول...

السلام عليكم..
اولا انا اشكركم جميعا علي اهتمامكم بقضايا المجتمع المصري والذي اصبح يعاني معاناه كبيره بسبب التقليد الاعمي والانسياق وراء افكار الغرب ..
انا اريد عمل حمله فريده من نوعها وهي بعنوان......(مكالمه حزينه)....
الاسم غريب ولكن الموضوع هادف وفعال وعلي من يريد الاشتراك معي في هذه الحمله .ان يرسل عبر الاميل-o_g707@yahoo.com
فتعالو معا نصلح الخلل ونستعيد كرامتنا واعتزازنا بتقاليدنا المصريه..وشكرا