قمر العيلة

ايوه ايه عمركوا ما شوفتوا حد بيدلع نفسه انا قولت اوفر عليكوا واغنى لنفسي بالفعل في مثل هذا اليوم من كام سنة -مش هقول اد ايه متهرجوش- بس اكيد مش من كتير اتولدت انا المدونة اللي اسمى شوية وشوية واصبح لعائلتى الكريمة قمر ينور لهم بالليل - مش يزن بالليل لا قدر الله- بس اكيد كنت طفلة طبيعة وميكونش اللي بناتى عاملينه فيا ده تخليص حق لمامتى وبابتى.

اصدقائي الغاليين عملوا لي عيد ميلاد يوم الخميس وكان جميل جزاهم الله خيرا

ووصلتنى رسائل جميلة جداً من اصحابي واخواتى وتليفونات بقي مقولكوش، الحمد لله الذى انزل المحبة في قلوبنا جميعاً لنسعد بعضنا البعض.

احلي رسالة مش هقول من مين انتو خمنوا:

اهديكي عمرى يا عمرى وقلبي لكي هدية

مقامك سما فوق السماء ونجومها ليكي هدية

كل سنة وانت طيبة

يا اعز واغلي ما لي

وعلي فكرة مخكوا ميروحش بعيد مش من زوجى لان احنا افعال لا اقوال زى ما بيقول

بس بجد حاسة بحب مالي قلبي بيكوا كلكوا وطايرة بيكوا

جزاكم الله خيراً علي كل شئ

احبكوا في الله

مذاق مر لكن حلو

رميت روحى علي السرير وبحلقت للسقف هروبا من اى كلام ومحاولة منى لايجاد صفحة بيضا في عقلي كى لا افكر في شئ وافتكرت علي سلامة وهو بيقول في يوم كده بيبان من اوله لا تقدر تبتديه ولا تعرف تكمله وقولت في نفسي اه في اسبوع كده بيبان من اوله لا تقدر تبتديه ولازم تكمله

الخميس بالنسبة لي احلي يوم في الاسبوع لان بعده الجمعة والسبت اجازة الواحد بقي يستريح ويرمى كل شئ وراه ويعمل كل الحاجات اللي بيحبها ومحروم منها طول الاسبوع- لعدم توافر الوقت.

الجمعة دى كانت غير اخواتها من الجمع مرت عليا حاجات كتير حادثة- مستشفي-نقطة شرطة- قسم شرطة - نيابة- قسم شرطة تانى شد وجذب مع زوجى لانه اتضايق انى عملت شكوى واتصال القسم مرة تانية بيا علشان الشكوى وخوفه من ان الضباط يخدوها علي كرامتهم انى ارسل شكوى فيضايقونى واحساسي انى لازم اخذ حقي تفاعلات نفسية غير عادية مرت بي

وفي وسط كل ذلك عندى اختبارات في الفقه والعقيدة وعلوم القران وانا كنت مركزة في القرأن ومفتحتش ولا كتاب فكنت بتحايل علي اى معلومة تدخل من غير تعب
مش عارفة ازاى إلا انه بفضل الله تعالي خلص الاسبوع علي خير واحلى حاجة اكتشفتها ان النهاردة الخميس يعنى اخر الاسبوع ها اجازة
والاحلى ان المذاق المر لكل تلك الاحداث كان حل حلو التفاعل معها

امنية

كان نفسي تقف جنبي

تشد ساعدى وتقولي عدي

الحق معاكي اوعي تسيبيه يعدي

دنيا ولا أخره.. هتاخديه

في الدنيا بأيديكي لو تقدري

في الاخرة لله سلمي

بس.... بعد ما تجربي

لا تستسلمي

رسالة لدفع القهر عن المواطنين

تعرض لحادث امس ولانى مرهقة جدا بس عايزه احكى عليه بالتفصيل هأجل الكتابة عنه بس هدون الرسالة الالكترونية التى ارسلتها تعليقاً عما حدث لي من نقطة الشرطة مروراً بقسم الشرطة حتى النيابة والتى عنونتها ب(رسالة لدفع القهر)

السيد الوزير الفاضل/ حبيب ابراهيم حبيب العادلي
وزير الداخلية-جمهورية مصر العربية
السلام عليكم ورحمة الله وبركاته

سيدى الفاضل اعلم مدى المسئوليات والاعباء التى تقودها سياتكم واعلم ايضاً عن ان الخدمات التى تقدمها وزارة الداخلية متنوعة ومتنوعة ايضاً في نوعية الاشخاص التى تتعاملون معها فوزارتكم تتعامل مع جميع فئات الشعب المصري وبكل طوائفه فلاحتياج لوزارتكم من الكبير والصغير ولوزير والغفير والنزيه والحرامي والاشخاص الغير محترمة والمحترمة.
قررت الكتابة الي سيادتكم بعد تعاملي مباشرة وبصفة شخصية مع قسم الشرطة وانا لم ادخل قسم الشرطة مطلقا سوى لعمل صحيفة حالة جنائية مرة واحدة والبطاقة الشخصية القديمة هذا هو تاريخ تعاملي مع الشرطة.
اما ما حدث لي فكان غريب عليً ولا يمكن ان تخيل انه لا فرق في التعامل في اقسام الشرطة بين انهاء اجراءات حادث تصادم وانهاء اجراءات شخصيات مثل الحرامية وتجار المخدرات وفتيات الدعارة .
تعرضت يوم الخميس الماضي 7/2/2008 لحادث تصادم مرور شخص من امام سيارتى فجأة بعد تعديه للسيارة التى كانت بجانبي فاصطدم بسيارتى وانا في حالة نفسية سيئة وقفت السيارة مسرعة الى المصاب واتصلت من محمولي بالنجدة وبعد ثوانى تذكرت ان المستشفي علي بعد امتار فساعدنى الشهود علي ان الرجل هو المخطئ في حملة ووضعه داخل سيارتي وذهبت به للمستشفي الخاصة ودخل طوارئ وتم عمل اشعة مقطعية علي المخ واشعات علي جميع جسده وطالبتنى المستشفي 600 جنيه مقابل ذلك وسددتهم بالفعل ومكثت مع المصاب من التاسعة صباحاً حتى الثانية عشر ظهراً وتخيلى ان الموضوع انتهى بفضل الله تعالي لان المصاب وطبقاً لفحوصات والاشعات بخير وهذا ما كان يهمنى بالفعل واذا بي اجد المصاب يماطل حتى يحصل علي مبالغ مالية منى فما كان من امرى إلا انى اخبرت المستشفي بعمل محضر بالواقعة حيث انى اعلم يقيناً انى لسيت المخطئة وسوف اخذ حقي.
لن اطيل عليك سيدى سوى انى اعلمك انه في مراكز الشرطة التابعة لسيادتكم لا تجد سوى معاملة واحدة لامثالي من المواطنين والاخرين كما تحدثت سابقا ارباب السوابق وشبكات الدعارة والمخدرات.
لن تجد بعد يوم كامل من النقطة -حيث ان منطقتى لا يوجد بها قسم شرطة- الي قسم الشرطة وما ادراك كيف تقضي سيدة مثلي في قسم الشرطة -وما تسمعه من الفاظ لا تليق حسبي الله ونعم الوكيل- حتى ذهب الي النيابة المسائية في الثامنة مساء.
من الثامنة والنصف صباحاً حتى التاسعة مساء لك ان تتخيل وضعي وكيف اقضي حاجتى واتوضا واصلي .
لا اريد من مراسلتى هذا شئ سوى ان يصل صوت لسيادتكم ليقول يجب ان نفرق في تعاملنا مع المواطنين ليس كل المواطنين حرامية او تجار مخدرات او يملكون شبكات دعارة.

ان تغيير ثقافة شعب تجاه وزارة ما لا يتتطلب اعلانات في وسائل الاعلام عن خدمات الوزارة ومدى ما وصلت اليه تغيير ثقافة الشعب ينبع من الافعال التى تجبر الشعب علي تغيير ثقافته

عفوا للاطالة ولكن اعلم يقيناً انه سيتم عمل شئ ايجابي من سيادتكم تجاه امثالي من ابناء الشعب

ملحوظة: انشئت مجموعة علي موقع facebook اسمها نحو معاملة ادمية من الجهات الامنية للمواطنين انتم جميعا مدعوين للمشاركة وده اللينك http://www.facebook.com/group.php?gid=8139152471&ref=mf

عــــــــــدنـــــــــــــا

وحشتونى وحشتونى وحشتونى مش وردة لا بجد وحشتونى ووحشتنى المدونة بعد السمكة اللعينة ما اكلت الكابلات-ههههههههه اظن كلنا سمعنا عن هذه النكتة عن توقف الانترنت-

احداث كتيرة مرت وحابة اتكلم علي كل حدث براحتى اول حدث انى سافرت زى ما قولت قبل كده قبل ما تخلص اجازة نصف السنة وقضيت وقت الحمد لله تعالي يعتبر مريح يعنى بالعربي اكل ومرعى وقلة صنعة ودى حاجة نادرا ما تحدث لي حتى انى وزنى زاد في الاربع ايام دول بشكل ملحوظ الواحد مش متعود.

نزلت من الاجازة علي الطحن بقي كفاية كده راحة كان عندى اختبار القرءان في اواخر الجزء الثانى من سورة البقرة الحمد لله عدى علي خير وسمعت كويس بفضل الله تعالي.

بدأت اجهز للفصل الدراسي الثاني مقولتلكوش ان سلمى المجرمة جابت 92% وده يعنى انتصار غير عادى ليا علي كسلها في المذاكرة الحمد لله.

اهم حاجة بقي الزغلول الكبير معرض الكتاب

اه والله يوم الجمعة اللي فات مروحتش جنينة الحيوان انتو دايما كده مستعجلين روحت المعرض وكنت مخططة انى اشوف غادة عبد العال وابارك لها علي النونو- الكتاب- واهنى وابارك واجيب الشربات بس يا خسارة زوجى حبيبي اظاهر خاف اقابلها ونعمل بقي زعماء وجمعيات وهو عارف دماغتنا سوف بفتح السين في الموضوع حتى انه ودانى المعرض الساعة 7 مساء وهو متأكد انه بيقفل بدرى بس علي مين روحت برده.

جريت علي جناح السعودية قبل ما يقفل في محاولة لمعرفة اخر اصدارات الشيخ سلمان العودة لحبي الشديد لفكره ولكن لم ارى سوى مجموعة عن فقه الطهارة ولانى اقتنى اكثر من مجلد عنه لم اشتريه وفضلت ان احتفظ بالفلوس لاشترى ما اريد عنها فضلت طول المعرض ادور علي كتاب لابي زر القلموني اسمه عون الرحمن في حفظ القراءان ليساعدنى في حفظ المتشابهات في القران بناء علي نصيحة صديقة في الله المهم لم احصل عليه وطفت علي كل الصالات يعنى اللي استطعت انى ادخلها دون جدوى.

الكنوز التى اشتريتها من المعرض النصيب الاكبر كان للدكتور عائض القرني :

التفسير الميسر اد ايه لغته سهلة وجميلة لمن يبدأ في معرفة التفسير ولاطفالنا كطريق اول لهم

اشراقات مجلد به من كل بستان زهرة يعنى من اجمل ما كتب الدكتور ررررررررائع

الشوارد يلم شوارد الابيات وجوامع الحكم المستخلصة من بطون الكتب

استمتع بحياتك للدكتور/ محمد العريفي

السلسبيل لراحة البال لسلوى بنت فرحان

الاسلام والاخر من يعترف بمن؟ومن ينكر من؟ للدكتور / محمد عمارة

مختار الصحاح عشت معاه بقي طول الليل اجرد الكلمة واجيب اصلها واطلعها منه

كتيب رررررررائع عن متون النحو وكتيب اخر عن العقيدة

من الاخر فلست بس كنت عايشة احلي ساعتين في حياتى وسط الكتب والقراءة من كل كتاب شوية كأنى بدوق الاول

سؤال بساله لنفسي من يوم ما عرفت المعرض هو ليه بيعملوه في الشتاء يعنى احنا نقدر نغير ميعاده هو مش عيد ولا رمضان بدل المشي في البرد والمطره واليوم اللي بيخلص قبل ما يبتدى يا جماعة هو عيب يعنى لو غيرنا ميعاده يبقي في الصيف واليوم معانا من اوله والجو مش برد ويكون كانه نزهة

ايه رايكم نضم اصواتنا لاصوات بعض ونطالب ان يقام المعرض في الصيف؟ من يؤيد..........

رتب أولوياتك

في حياة كل منا اولويات واشياء اخرى كثيرة منها المهم في حياته ومنها غير المهم واحيانا كثيرة ولعدم قدرتنا علي ترتيب اولوياتنا او تخطيط حياتنا ومعرفة اهمية الاشياء في حياتنا بنتوه وبتمشي حياتنا يوم يطرد يوم وخلاص ولان كتير مننا لا يرتب حياته كما يرتب بيته دائما او عمله نوصل في اخر القطار او العمر نفكر هل فعلا عملت اللي انا عايزه او كنت بعمل الحاجات الصح في الوقت الصح

من هنا التخطيط لازم يكون شئ اساسي في حياة كل منا هعمل ايه امتى وازاى وعلشان واهم حاجة علشان لان سبحان الله لما الانسان بيريد خير ربنا سبحانه وتعالي بيوفقه وبيبارك له في وقته من فترة طويلة قريت القصة دى وسمعهتها بعد كده من د/ ابراهيم الفقي ومن د/ طارق سويدان وغيرهم وهى في الحقيقة افادتنى بشكل غير عادى وعرفت ان وقتى ينفع يتعمل فيه اكثر من حاجة بالتخطيط والترتيب والتوكل علي الله تعالي والحمد لله، حبيت تقروا معايا القصة علشان كلنا نستفيد ونلاقي وقت نشرب فيه الشاي ايه رايكم فيها:

وقف بروفيسور أمام تلاميذه..
ومعه بعض الوسائل التعليمية..
وعندما بدأ الدرس ودون أن يتكلم .. أخرج عبوه زجاجيه كبيره فارغة.. وأخذ يملأها (بكرات الجولف ) ثم سأل التلاميذ .. هل الزجاجة التي في يده مليئة أم فارغة ؟ فاتفق التلاميذ على أنها مليئة .. فأخذ صندوقاً صغيرا من الحصى .. و سكبه داخل الزجاجة .... ثم رجها بشده حتى تخلخل الحصى .. في المساحات الفارغة بين كرات الجولف .. ثم سألهم ....؟ إن كانت الزجاجة مليئة ؟ فأتفق التلاميذ مجدداً على أنها كذلك .. فأخذ بعد ذلك صندوقاً .. صغيراً من الرمل ..و سكبه فوق المحتويات في الزجاجة.. و بالطبع فقد ملأ الرمل باقي الفراغات فيها.. و سأل طلابه مره أخرى.. إن كانت الزجاجة مليئة ؟ فردوا بصوت واحد ..
بأنها كذلك ..... أخرج البروفيسور بعدها فنجاناً من القهوة.. و سكب كامل محتواه داخل الزجاجة .. فضحك التلاميذ من فعلته .. و بعد أن هدأ الضحك ..
شرع البروفيسور في الحديث قائلاً : الآن أريدكم أن تعرفوا ما هي القصة .. إن هذه الزجاجة تمثل حياة كل واحد منكم.. وكرات الجولف .. تمثل الأشياء الضرورية في حياتك :
دينك ، قيمك , أخلاقك ، عائلتك , أطفالك ,
صحتك , أصدقائك . بحيث لو انك فقدت (( كل شيء )) و بقيت هذه الأشياء فستبقى حياتك ..
مليئة و ثابتة .. أما الحصى فيمثل الأشياء المهمة في حياتك : وظيفتك , بيتك , سيارتك .. وأما الرمل فيمثل بقية الأشياء .. أو لنقول : الأمور البسيطة و الهامشية.. فلو كنت وضعت الرمل في الزجاجة أولاً .. فلن يتبقى مكان للحصى أو لكرات الجولف .. وهذا يسري على حياتك الواقعية كلها .. فلو صرفت كل وقتك و جهدك على توافه الأمور.. فلن يتبقى مكان للأمور التي تهمك .. لذا فعليك أن تنتبه جيدا و قبل كل شيء للأشياء الضرورية ..
لحياتك و استقرارك ..
و أحرص على الانتباه لعلاقتك بدينك ..
وتمسكك بقيمك و مبادئك و أخلاقك .. أمرح مع عائلتك ، والديك ، أخوتك ، وأطفالك ..
قدم هديه لشريك حياتك وعبر له عن حبك ..
وزر صديقك دائماً وأسأل عنه..
أستقطع بعض الوقت لفحوصاتك الطبية الدورية .. و ثق دائما بأنه سيكون هناك وقت كافي للأشياء الأخرى ....... ودائماً ..
أهتم بكرات الجولف أولاً ..
فهي الأشياء التي تستحق حقاً الاهتمام .. حدد أولوياتك .. فالبقية مجرد >>> رمل.. وحين انتهى البروفيسور من حديثه..
رفع أحد التلاميذ يده قائلاً:
أنك لم تبين لنا ما تمثله القهوة ؟
(( فابتسم )) البروفيسور وقال : أنا سعيد لأنك سألت .. أضفت القهوة فقط لأوضح لكم..
بأنه مهما كانت حياتك مليئة .......
فسيبقى هناك دائماً مساحه..

لفنجان من الشاي

نربي عجول للمستقبل

بعد تجربة امتحان اللغة العربية والمذاكرة وحل الامتحانات وحل النماذج احب اقول لكوا الخبر الاتى

بعد الامتحان الاول: قل ولا تقل

قل نربي عجول للمستقبل ولا تقل نربي عقول للمستقبل

اوعوا حد يضحك عليكوا

تحياتى