الخميس، 29 نوفمبر، 2007

البهلوان والمرأة العاملة

عمرى ما حبيت انى اتفرج علي السيرك ولا في اى مرحلة من مراحل حياتى حتى لما البنات بيتفرجوا علي السيرك مش بيشدنى انى اتفرج معاهم زى افلام الكرتون او والت ديزنى بس في الحقيقة اللي اظنه في لاعبي السيرك انهم علي لياقة عالية وتدريب يومى مستمر الي ان يصل الي هذه المهارة في الفترة دى كل ما افكر في المرأة العاملة اربط بينها وبين بهلوان السيرك بل ان المراة العاملة اكثر لياقة من بهلوان السيرك لان البهلوان يستطيع ان يلعب باكثر عدد من الكور وهو علي سبيل المثال 6 كرات اما المراة العاملة فتستطيع ان تلعب باضعاف هذا العدد بداية من اللعب مع وسائل المواصلات للذهاب والعودة من العمل مرورا باللعب مع الحضانات والدادة لترعى الاطفال في غيابها او للانتظار إذا تأخرت عن موعد انتهاء العمل بالحضانة ثم باللعب في تحضير الطعام سريعا محاولة منها لتوفير اى وقت ممكن لتبدأ مرحلة اللعب بالواجبات المدرسية والمذاكرة للاولاد ثم اللعب لانقاذ ما يمكن انقاذه في المنزل دى الكور السريعة لم نتحدث عن الكرة الاخطر وهى التربية ، وفي النهاية المطلوب منها ان تلعب علي الكرة الخاصة بها يعنى لو فيها شوية جهد ..صحة..نفس اى حاجة منهم لان لنفسها عليها حق ولعبادتها ايضا حق او اى هواية تفتكروا بعد كل هذا الجهد ممكن يكون في واحدة منهم اى نفس للعب بالكرة الاخيرة لا اعتقد وفي النهاية جميع الكرات تمام الا كرتها هى, قرأت تدوينة للاخت صاحبة مدونة ما علينا وهى تتحدث عن عمل المرأة وانها حتى رغم ان عملها لا غبار عليه الا انها تحس انها ليس من هذا العالم سبحان الله وتتسآل لو مش العمل يبقي ايه ، اما انا فبسأل هل العمل هو وسيلة لقتل الوقت؟ أم هو وسيلة لكسب العيش؟ أم هو وسيلة لتحقيق الذات؟ أم هو الوسيلة للاحساس بالاهمية والاهتمام؟ ام هو وسيلة لايجاد وسط للعيش فيه بخلاف البيت والاهل؟ أم هو وسيلة لتأمين المستقبل؟ كل الاسئلة بتدور في راسي تبحث عن اجابة ربما يكون مجتمعين عند احدانا او متفرقين اما النهاية فواحدة .
للمفارقة انا وبعض الاخوات في المسجد كنا نتحدث بالامس فقط عن ان زميلة لنا تركت العمل وتقول اخيرا اخذت القرار وعند تعجبنا ردت قائلة تفتكروا ده كان يبقي حالى لو اننى مازلت بالعمل انا الان احفظ جيدا واحضر المحاضرات وجسدياً لست متعبة واخرى ردت قائلة انا ايضاً عندما اتزوجت سوف اترك العمل واكيد ده مش قرار صعب الحديث معهم رجعنى حوالي 12 سنة واخذت تنهيدة عميقة ولا اعتقد ان احداً فهمها غيري

تجربة

عند الامتحان يكرم المرء او يكرم برده ، الحمد لله كان عندى اختبار شفوى امبارح في سورة البقرة حتى الايه105 ودى اول مرة يطلب منى التسميع من مواضع متفرقة كنت خايفة جدا ان مجهودى في الفترة الي فاتت لو مسمعتش كويس احبط او ان نفسي والشيطان يخدوه مدخل انى مستمرش ده كان كل قلقي بس الحمد لله علي قد ما التجربة كانت جديدة الا انها تمت علي خير وقالت المحفظة انتو خايفين كده ليه ده هو جزء امال لما تكملوا وتمتحنوا في 30 جزء تعملوا ايه سرحت وقولت لنفسي ياه ياريت اللهم يسر لنا فظ كتابك الكريم ، اول ما سالتنى حسيت ان مخى عبارة عن ورقة بيضة فاضية مفيهاش اى كتابة بس شوية ابتديت استرجع يعنى وقفت شويتن في اخر سؤال بس الحمد لله الاجمالي تمام واحكام التجويد تمام ، سالتنى خمس اسئلة اقرى من قوله تعالي:

أو كصيب من السماء

إن الله لا يستحى

وإذ نجيناكم

وإذا استسقى

ولما جاءهم

وفيه موضعين ولما جاءهم ولما بدأت قالت لي لا ولما جاءهم الاخرى ايه الحلاوة دى ، سبحان الله مكنتش متخيلة انى ممكن اعرف اقرأ من غير تواصل سبحان الذي علمنا زى كده شريط الكاسيت اللي بتجريه من الاول للاخر وهكذا الحمد لله وسعادتى زادت جدا لما كمان اختى وخالتى سمعوا كويس يا سلام والله صحبة الخير دى مالهاش حل اتحفزنا جدا بعد الاختبار وخرجنا احنا الثلاثة تقريبا طايرين من الفرح

الأربعاء، 21 نوفمبر، 2007

لون حياتك


جميل اوى لما تكون زهقان وحاسس ان الوقت بيعدى بسرعة البرق وانك مش لاحق تعمل اي حاجة وانك عايزة تعمل حاجات كتير جدا واليوم قصير ده في حد ذاته جميل وهو ده الجانب الممتلئ من الكوب ليه لان فيه ناس كتير جدا مش عارفين يعملوا ايه واليوم بيعدى بالزق معاهم في مشاهدة علي التليفزيون او رغي في التليفون او في التواجد المستمر في النوادى والموضة في الزى والشعر واللون وفلانة عملت تحس كده انك يا مؤمن مختلف تحس انك انسان انك عايز تعمل صلة رحم ازاى يوم يعدى من غير ما تعمل صلة رحم وازاى يوم يعدى من غير صلاة نوافل دينا جميل اوى وفيه ابواب خير كتييييييير تشعرك بآدميك وانك مش عايش علشان تاكل وتشرب وبس.

ايوه علي غرار جدد حياتك والنيو لوك اللي كل الناس عملته
تعالوا بينا كلنا نلون حياتنا بالطاعات

السبت، 17 نوفمبر، 2007

تاج

بصراحة زى كده ما اكون مصدقت ان محمود صاحب مدونة آلام وآمال يبعت لي التاج ده لانى كل ما ادخل علي مدونة الاقي فيها تاج اقعد افكر واقول لو اتوجه لي السؤال ده هرد بايه يعنى ظريف ان الواحد يتسأل اسئلة مش متخيلها فيفكر ويجاوب وتتطلع منه حاجات جميلة ميكنش حاسس بيها زى مثلاً هل انت راض عن حياتك؟ ما هو اسوأ شي حصل لك او ممكن يحصل؟ لاننا بتعيش الحياة ومواقفها بس ومفيش وقت تفكر هل انت سعيد؟ لو اه له؟ ولو لا برده ليه؟ وربما تكون دى وقفة توجهنا او تنير لنا الطريق للقادم.............. يالا بقى نشوف التاج بقي اخباره ايه-محدثةنعمة شكلى كده:
لو قالولك اختار عصر من عصور مصر علشان تعيش فيه تختار اى عصر و فى عهد اى حاكم ؟
لو اتسألت السؤال ده من فترة كنت جاوبت اجابة تانية خالص بس دلوقتى بقول ان ده اكيد احسن فترة اللي انا بعشها لان هو ده قدرى فمش هفكر في عصر تاني لانه ده اكيد الاحسن.
اول اولويه فى حياتك عيلتك ولا شغلك ولا اصحابك ؟
عائلتي طبعاً ومن غير تفكير
ايه اكتر حاجه بتحبها فى رمضان ؟
كل حاجة في رمضان بحبها اللمة ,الصحبة , الشوارع ساعة الافطار, الخير, الصلاة, الصيام, التراويح, التهجد, وقت الشغل, كله كله ررررررررائع.
أوصف ليا اجمل فطار ممكن تفطره ؟
افطار كل عائلتنا فيه مجتمعة علي حب وطاعة الله سبحانه وتعالي
لو انت حاكم علي مجموعة من الافراد هتكون عادل؟ طب هتعمل ايه علشان تتأكد انك حاكم عادل؟
اكيد هحاول طبعا اكون عادلة علي قدر المستطاع وبعدين كل واحد فينا راع ومسئول عن رعيته والراع ده اكيد في منزلة الحاكم سواء في العمل لو هو مدير او في البيت عن الاولاد .
انت مش محتاح انك تعمل حاجة علشان تتأكد انك حاكم عادل من احوال الرعية بيبان من غير اعمال.
اللى بيبوظ الحكام .. نفسهم؟ ولا الشعب؟ ولا الحاشيه المقربه ؟
كلهم بيبوظا بعض
مين أكتر اعلامي مصري بتحترمه ؟
مش متابعة غير منى الشاذلي في العاشرة مساء وقلم رصاص لحمدى قنديل
قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه ؟
لا بس هدخل اشوف المدونة ان شاء الله
لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه ؟
كنت عايزة زممممممممممممممممان اطلع مرشدة سياحية مش عارفة ليه -مع انى متأكدة انى منفعش-.
ايه تانى بلد تتمنى تعيش فيها بعد مصر ؟
انا مبفكرش انا عارف المدينة المنورة طبعاً
بتراعي كلام الناس والقيل والقال ؟لو اه او لو لا قول لى ليه؟
لا لانى قبل ما اقدم علي اى عمل بكون درسته كويس وعارف ايه مزايه وعيوبه وبتشير وبستخير علشان كده لا اعبء بكلام الناس
صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد ؟
لا لان كل ما الانسان بيستخدم التكنولوجيا حياته بتتغير غير لما يكون ما استخدمهاش اصلاً تفرق كتيير
السعاده هى؟
رضا الله عليك
عندك أمل ؟ أسبابك؟
اكيد عندى امل هو فيه حد يقدر يعيش من غير امل ايمانى ينبع منه املى
لما تحب تهرب من كل شئ بتروح فين ؟
بمسك كتاب او جريدة وكوباية شاي واقعد مع نفسي
امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت ؟
كل ما احس انى نفسي قصر او بمعنى اخر الاقي روحى مش طويلة مع المشاكل اقول اه شكلك كبرتي
لما بتعمل عمل خيرى بيكون ايه هو دافعك الاول ؟
رضا ربنا وتقبل العمل لدخول الجنة
بتشرب سجاير ؟ لو الاجابه اه ايه شعورك لو شفت ست بتشرب سجاير ؟ وليه ؟
لا بس كان في دماغي من زمممممممان ان شرب السجاير انحراف وانا معرفتش انحراف طول عمرى
بتعرف ايدك اليمين من الشمال ازاي ؟
الشمال فيها الدبلة
ايه اكتر اله موسيقيه بتحبها ؟
كنت زمان بحب الهارمونيكا بس يعنى كده نفسي اتقطع
فى رأيك ليه الذوق والنخوه اتعدموا ؟
مفيش حاجة اتعدمت قلت اه بس لسه فيه والسبب ان الناس بعدت عن الدين بمفهومه الصح وبقي محصور في العبادات وبس ايه الحاجى اللي لو حصلت لك تبقى سعيد قوى ؟ ان اتم حفظ القرآن الكريم واحصل علي الاجازة
تختار يبقى عندك ... ارض زراعيه ولا اجنس عربيات و لا كام عماره و لا فلوس فى البنك ؟ اختار الله فيهم راحة البال
البحر و لا النيل ؟ النيل طبعا لانى بخا ف من البحروبشرب من النيل
مركب و لا طياره ؟ االلي متعرفهوش انى بخاف موووووووووت من المية تبقي الطيارة اكييييد
مجنون و لا عاقل ؟ ساعات الجنون بينفع بردة بس العادى عاقل
اتقرأ كتاب و لا تتفرج عليه فيلم ؟ اقراه ده اكيد لانى بشوفه بالقرأة بعينى انا مش بعين المخرج او الممثل
بتمرر التاج لمين ؟
علي غرار المواطنين بعد الانتخابات انا في الاول بشكر كل اللي تعب نفسه وقرأ التاج ده واعذرونى لو اطلت عليكم او كنت غلسة في حاجات ثانيا احب امرره لكل صاب مدونة او حتى مش صاحب مدونة يقرأ ويجاوب ويشوف اخبار نفسه ايه وممكن اخص ءارباب متفرقون خير عايزة اشوفه و السلام ختام

السبت، 10 نوفمبر، 2007

اسبوع الصداقة الصدوقة




البنات (بناتى الثلاثة) وهما بيتفرجوا علي تيمون وبمبا الكرتون المعروف كان فيه حلقة عن يوم الصداقة الصدوقة وكنت فاكرة ان ميش بيوم اسمه كده وانه شغل كرتون، الي ان وصتنى رسالة قصيرة كان لها اثر جميل علي النفس محتواه بيقول:

Do u know the relation between you eyes?

They blink together,they move together,they cry together,they see things together and they sleep together.

Even though they never see each other....Fiendship should be just like that!!!!! Life is like hell wihout fiends.

It's world best friend week.

Who is your best friend?

حلوة صح جميلة جدا اهم حاجة انه طلع فيه فعلا يوم الصداقة الصدوقة واهم سؤال هو مين يكون صديقك الصدوق؟

او بمعنى اخر مين هو الشخص اللي تفضل انك تفضفض معاه لما تحس انك مهموم او فرحان او محتاج نصيحة تجري تروح له؟ حد فينا فكر في الصديق الصدوق ولا زى ما بتيجى واى انسان قريب والسلام, كان لسه صديق عزيز بيقول لي ان في الاوقات الصعبة دى لازم يكون فيه حد جانب كل واحد فينا يلجأ اليه وقت الفرح او الضيق او حتى لو حب يتكلم وبس ويحس ان فيه حد بيسمعه وبيسمعه صح, اكيد كل واحد منا محتاج للانسان ده اللي يكون حتة منه

بصراحة فكرت كتير لانى الحمد لله عندى اصدقاء بحبهم في الله اصحاب وجيران وفي العمل ومن الدراسة واصحاب من الطفولة واصحاب في الله من الدورس والمعهد طب مين هو الصديق الصدوق بصراحة كل واحد منهم له شخصيته المميزة والتى تتسم بصفات جميلة جدا احبها ومفيش حد يخلوا من العيوب سبحان الله بجد بجد كلهم مع بعض بيكونوا فريق صداقة صدوقة مش ممكن يعنى لما بحتاج لمشورة دينية بحتة ومحتاجة راي مخلص اعرف من ألجأ اليه/ اليها ولما بحتاج افضفض عارفة مين يستحمل غلاستى ولما احب استشارة علمية معملية فزة برده عارفة مين فيهم كلنا مع بعض فريق الصداقة لزنقة وضيق وفرح دايما موجود.

انتوا بقي ايه اخباركوا مين الصديق الصدوق لكم!!! مستنية اعرف؟؟؟؟؟؟

وقال الامام الشافعي في قصيدة 'الخل الوفي' عن الصداقة والاصدقاء

اذا المرء لا يرعاك الا تكلفا

فدعه ولا تكثر عليه التأسفا

ففي الناس أبدال وفي الترك راحة وفي القلب صبر للحبيب ولو جفا

فما كل من تهواه يهواك قلبه ولا كل من صافيته لك قد صفا

اذا لم يكن صفو الوداد طبيعة فلا خير في خل يجيء تكلفا
ولا خير في خل يخون خليله ويلقاه من بعد المودة بالجفا
وينكر عيشا قد تقادم عهده ويظهر سرا كان بالامس قد خفا
سلام على الدنيا اذا لم يكن بها صديق صدوق صادق الوعد منصفا
اه والله سلام علي الدنيا ان لم يكن بها صديق صدوق صادق الوعد منصفا

ودى عجبتى جدا عن الصداقة وبتعبر عن فريق الصداقة ايه رايكم؟؟
للحـب عيـد .. وللوطـن يـوم ميـلاد
واليوم .. شكل اليوم ( عيد الصداقـه

صنـدوق جوالـي لـه شهـور مـازاد
تقـول بـه عـن المواصـل إعـاقـه
واليوم .. هـو ويّـا المراسيـل بجهـاد
مابـه صديـق الا بعـث لـي بطـاقـه
" هذا معه بعـض النصايـح والارشـاد
ينصح بحب .. وطيب قلـب .. ولباقـه
يسلى ويبطي به زمانـه .. وإلا عـاد:
كنـه يقـدم لـي مـن الـورد باقـه "
" وهذا ضحوك وخاطـره ياسـع بـلاد
واشفـق لوصلـه يـوم يبطـي شفاقـه
يغيب ماقصده بهـا صـدّ .. وبعـاد ..
بـس الزمـن محكـم عليـه إنغلاقـه "
" وهذا عزيز.. وغالي.. وعون.. واسناد
ويتعـب علـى نفـع القريبيـن ساقـه
أبطي .. واقصّر في وصاله .. ويـزداد
بالوصـل وفعـولٍ تـعـز الرفـاقـه "
"" وهذا زعول .. وواقفٍ لـي بمرصـاد
غالـي .. ولكـن بـه شويـة طفاقـه
مايرسـل الا كــود شــاره ونـقّـاد
ويبحث ورى بعـض العلـوم الدقاقـه ""
"" وهذا يجـي كنـه صباحـات الاعيـاد
يرسـل ويبـدي بالحـروف اشتيـاقـه
وانا ادري انـه مايجـي الا لـه مـراد
والله يعجّـل فـي مجـيّـه فـراقـه ""
"" وهذا عن علومـي والاخبـار نشّـاد
ينشد عن أحوالـي .. ووضـع العلاقـه
ثـم دبلـج الفلـم الثـلاثـي الابـعـاد
وباااعه على اللي يشتـرون الحماقـه ""
الوصل طيّـب .. لوهـو بـدون ميعـاد
لكنّ بعـض الوصـل .. مـرٍ مذاقـه ..
لاصار مايبنـى علـى العـز .. لاعـاد
ولاعاد .. جابه .. ومـدّه .. وساقـه ..
وختامها تكتـب علـى روس الاشهـاد
بيتين .. ماهي من ضميـري سراقـه:
" ياصبر جوالي علـى بعـض الافـراد
اللـي بثقـل الـدمّ .. عنـده لياقـه ..
وياحظـي بوصـل الكريميـن الاجـواد
اللي يعزّون الخـوي .. والصداقـه .."

الاثنين، 5 نوفمبر، 2007

النجاح


احساس النجاح ده احساس حلو جدا واثره طيب علي النفس لان كل انسان يتشوق ان يشوف نتيجة تعبه ومجهودة مكللة بالنجاح الكلام ده بقوله وحسيته قوى وانا بحضر حفلة تكريم ابناء العاملين المتفوقين اللي اقامتى شركتى الحبيبة أوليمبيك جروب ، الاحتفال كان حلو جدا جدا جدا -الله يبارك للقائمين عليه للظهور بالمظهر الجميل ده- الاحتفال كان في سرايا1 بفندق انتركونتنتال سيتى ستارز .
الاولاد والبنات المكرمين كان شكلهم حلو جدا جدا وهم لابسين الكاب وهم داخلين القاعة علي موسيقي المارش كل اللي كانوا حاضرين كان حاسين بالفرحة معاهم وكانوا بيدعولهم من كل قلوبهم ان ربنا سبحانه وتعالى يمن من فضله عليهم ويستمروا في مزيد من النجاح وافتكرت اغنية عبد الحليم حافظ وبنفس الحماس اللي كنا بنقوله واحنا في سنهم
الناحج يرفع ايده ويغنى في عيدنا وعيده
ايوه
صح يوم نجاحك هو يوم عيد بالنسبة لك فما بالك بابوك وامك اللي تعبوا وسهروا الليالي وانفقوا وخصوصا للي في الثانوية العامة اد ايه كانت فرحة الاهالي بهم وكل واحد واخد ابنه وهو شايل وسام التفوق اللي قدمته ادارة المجموعة والفرحة في عيونهم ظاهرة جدا كان يوم جميل جدا جدا خرجنى من المود اقصد الحالة المزاجية اللي كنت عايشاها بعد قراءة خبر وفاة الاخت بهلولة وقولت سبحان الله وسبحان مقلب القلوب يقلبها كيف يشاء ومتى شاء واستحضرت الحديث الشريف: قال رسول الله صلى الله عليه وسلم قال: ((يتبع الميت ثلاثةٌ: أهلهُ ومالهُ وعملهُ: فيرجع اثنان، ويبقي واحد ؛ يرجعُ أهلهُ ومالهُ ويبقى عملهُ" متفق عليه يعنى في الاخر الحمد لله عمل الواحد هو اللي هيبقى معه يعنى نعمل ومش نعمل وبس لا كمان الاحسان زى اللي الاولاد عملوه -يارب يستمروا في الاحسان ده علي طول حياتهم بجد مصر هتبقي حاجة محصلتش لو كمان في حياتهم العملية استمروا بنفس النجاح والتميز -وايضاً ما رواه البيهقي "إن الله يُحب إذا عمل أحدكم عملاً أن يتقنه"يعنى مفهوم الجودة وتجويد العمل مش جديد علي المسلمين ، فالإسلام يحثنا على إتقان العمل ويدعو للتحسين والجودة والإتقان في العمل وجعل لمن يحسن العمل أطيب الجزاء في القران الكريم ، مثل قوله سبحانه وتعالى (( صُنع الله الذي أتقن كل شيء إنه خبير بما تفعلون )) النمل 88
، وقوله سبحانه (( إن الذين آمنوا وعملوا الصالحات إنا لا نضيع أجر من أحسن عملاً)) الكهف 30 " الحمد لله زى ما فيه مواقف بتذكرك وتفوقك كمان فيه مواقف بتحسك علي العمل وتفكرك برده بس من ناحية تانية.
التدوينة اللي جاية ان شاء الله يكون معايا الصور علشان الاحساس يوصل بالصورة اكثر وتشاركونى احساسي الجميل
الورد ده للمتفوقين في كل مكان وكل زمان وكل مجال ولاهلهم واللي حسوا بهم زى ً

السبت، 3 نوفمبر، 2007

قالوا ماتت

من فترة طويلة وانا حاسة ان الوقت بيمر بسرعة غير عادية واليوم بيمر كانه ساعة والاسبوع كذلك ولما فتحت اجندة عام 2007 قولت ياه 2006 مرت بسرعة جدا طب عملت فيها ايه بس بصراحة قولت اهم حاجة عملتها السنة اللي فاتت انى اديت فريضة الحج انا وزوجى الحبيب ودى كفاية اوى لانها نعمة وفضل من الله لادخل لي بها لانى منذ سنوات وانا ابكي واحترق شوقا لاداء هذه الفريضة العظيمة الي ان من الله علي بادائها طب سنة 2007 وانا بتصفح الاجندة لقيت اننا بقينا في اخرها طب عملت ايه. كنت من فترة وضعت خطة انى لازم اكون حافظة القرآن ودرست علم الحديث والتفسير ده بدخولي العقد الرابع تمهيدا لدخولي معهد اعداد الدعاة عل الله ان يستخدمنى لخدمة دينى طب عملت ايه بقي علشان ده يتحقق،اجهدنى التفكير واثناء حديثى مع شخصية احترمها جدا واقدرها قال لي مش لازم كل حاجة تبقي 100% ممكن حاجة تكون 75% وتكون كويسة فلا ترهقي نفسك باكثر مما تستطيعى يعنى لو الوقت ده ما ينفعش فيه قرأة قرآن ممكن تقدرى تصومى وهكذا بصراحة اثرت فيا كتيرالمحادثة دى ويمكن هى اللي ريحتنى في رمضان لما ظروفي كانت تمنعنى ان اصلي التراوح في المسجد واقول كل مرحلة من عمرنا لها مزايا وعيوب ولازم اننا نتواءم من ظروفنا يعنى ان شاء الله لو ربنا احيانى كمان سنتين تلاتة ممكن البنات يكونوا كبروا واقدر انزل وان مضطمنة ، لكن بعد شوية قولت لا طب اعلم قضاء الله منين وهل هقابل الله لو قالوا ماتت وانا نفسي اقابل ربنا سبحانه وتعالي بأضعف الايمان علي الاقل الزهراوين (البقرة وآل عمران) لو وافتنى المنية وانا بعمل احسن من ركونى وانتظارى لظروف احسن تعيننى علي اللي عايزة اعمله وعزمت علي انى اشوف محفظة او دار من دور التحفيظ للالتحاق بها الي جانب انضمامى الي الاكاديمية الاسلامية المفتوحة لدراسة باقي المواد الشرعية خصوصا انها متاحة للدراسة عبر الانترنت و اثناء مرورى علي دور تحفيظ القرآن اخر رمضان محاولة منى لانقاذ ما يكن انقاذه وجدت معهد اعداد محفظى القران الكريم ويشاء الكريم ان فترة التقديم تمتد حتى اقدم فيه وبدأت وانا متوكلة علي المولى سبحانه وتعالى ان يساعدنى ولكن لانشغالي في البيت والعمل لا استطيع الحضور بصفة مستمرة فاعود لنفس المشكلة وهى الوقت مش عارفة اجيب وقت منين بس هحاول وادعولي لانى خايفة جدا اقابل ربنا من غير ما اعمل حاجة وادعوا لبهلولة ان يتغمدها الله برحمته واسال الله ان يبارك لنا في اعمارنا والمسلمين وفي اوقاتنا واوقات المسلمين.. امين امين معلش اطلت عليكم بس حبيت تشاركونى همى وافضفض مع احبابي

الجمعة، 2 نوفمبر، 2007

ممكن تدخلوا وتقولوا رائكوا

دى مدونة عملتها انا وخالتى عمل مشترك اصلي بحب العمل الجماعي ممكن تقولواي رايكوا
احبكوا في الله